shimaliy koréye bilen rusiye otturisida poyiz qatnishi ashti
shimaliy koréye bilen rusiye otturisidiki tömür yol qatnishiining ashqanliqi süniy hemrahtin tartilghan süretler bilen ashkarilandi.
türkiye awazi radyosi xewiri: amérika istratégiyelik xelqara tetqiqat merkizining «Beyond Parallel» namliq layihesi shimaliy koréye bilen rusiyening yéqinqi künlerdin buyanqi tömür yol qatnishigha dair süniy hemrah resimlirini hembehirlidi.
«Beyond Parallel» layihesi teripidin élan qilinghan yazma bayanatta, ilgiri körülüp baqmighan shekilde 73 yénik tömür yol wagonining shimaliy koréye - rusiye chégrasidiki tumagang poyiz istansisida turghanliqi uqturuldi.
bayanatta, mezkur qatnash nisbitining yéqinqi 5 ay ichide eng yuqiri sewiyige chiqqanliqi, ikki dölet otturisidiki poyiz qatnishining yuqumdin ilgirikige sélishturghanda téximu qoyuq boluwatqanliqi otturigha qoyuldi.
bayanatta: «(shimaliy koréye rehbiri) kim jongun we (rusiye pirézidénti) wiladimir putinning yéqinda ötküzülgen bashliqlar yighinida bir qisim herbiy soda we hemkarliqni muzakire qilghanliqini nezerde tutqinimizda, tömür yol qatnishidiki bu éshish shimaliy koréyening rusiyege qoral-yaragh we oq-dora byollawatqanliqini körsitishi mumkin» déyildi.
<CBS News> tori tünügün amérikaliq ismini ashkarilashni xalimaydighan bir emeldarni menbe körsetken xewiride, «qoral bilen teminlesh we herbiy hemkarliq» qatarliq témilar muzakire qilinghan 13-séntebirdiki shimaliy koréye rehbiri kim jongun bilen rusiye pirézidénti wiladimir putinning uchrishishidin kéyin, pyongyang dairilirining moskwagha qoral ewetishni bashlighanliqi ilgiri sürülgen idi.
xewerde shimaliy koréyening ewetishke bashlighan qorallarning bedilige rusiyedin némilerni alghanliqi, yaki bu mal toshushning «uzun muddetlik teminlesh zenjirining bir qismi weyaki téximu cheklik toshush» ikenliki heqqide éniq melumat yoqluqi bildürülgen idi.
