josép borrél quran kerimni köydürüsh heriketliri heqqide muhim söz qildi
yawropa ittipaqi tashqi munasiwet we bixeterlik siyasiti aliy wekili josép borrél quran kerimni köydürüshke oxshash heriketlerning térrorchilar teripidin suyiistémal qiliniwatqanliqini éytti.
türkiye awazi radyosi xewiri: yawropa ittipaqi tashqi munasiwet we bixeterlik siyasiti aliy wekili josép borrél quran kerimni köydürüshke oxshash heriketlerning térrorchilar teripidin suyiistémal qiliniwatqanliqini we ünümlük qarshi turush üchün jemiyette keng qorsaqliqni omumlashturushning zörürlükini bildürdi.
borrél amérikaning nyuyork shehiride ötküzülgen b d t 78-nöwetlik omumiy kéngishige qatnashti we yershari térrorluqqa qarshi küresh munbiri (TMFK) ning 13-nöwetlik ministirlar yighinida échilish nutqi sözlidi.
borrél misir tashqi ishlar ministiri samix shukri bilen birlikte teng derijilik bashliqliq wezipisini ötigen mezkur yighinda, térorluqqa ünümlük zerbe bérish üchün jemiyette keng qorsaqliqni teshebbus qilish kéreklikini tekitlidi.
josép borrél, «biz jemiyitimizde ighwagerchilik heriketliri, chidimasliq we öchmenlik heriketlirige köplep shahit bolmaqtimiz. biz quran kerimning köydürülgenlikini körmektimiz. bular térrorluq unsurliri teripidin burmilanghan idiologiyesini yéyish, térrorluq heriketlirini teshkillesh we ishqa ashurush üchün qayta-qayta suyiistémal qilinmaqta» dédi.
borrél yazda shiwitsiye we daniyede yüz bergen quran kerimni köydürüsh herikiti üstide toxtilip, «yawropada bezi kishilerning nurghun musulmanlarni azablighan heriketliridin kéyin, yawropa ittipaqi her qandaq shekildiki diniy öchmenlikni ilgiri sürüshni qetiy ret qilidighanliqini tekrarlidi» dédi.
