gutérrés: qaradéngiz ashliq karidorini janlandurush iradem qetiy
birleshken döletler teshkilati bash katipi antoniyo gutérrés qaradéngiz ashliq karidorini janlandurush iradisining qetiylikini, bu dairide dawamliq uchrishishlarni élip bériwatqanliqini éytti.
türkiye awazi radiyosi xewiri: birleshken döletler teshkilati bash katipi antoniyo gutérrés amérika qoshma ishtatlirining nyu york shehiridiki b d t binasida élan qilghan bayanatida, kéler hepte ötküzülidighan b d t omumiy kéngishi yighinida türkiye jumhuriyiti jumhur reisi rejep tayyip erdoghan, ukraina pirézidénti wolodimir zélénskiy we rusiye tashqi ishlar ministiri sérgéy lawrow bilen ayrim - ayrim körüshidighanliqini, uchrishishlirining asasliq küntertip maddiliridin birini qaradéngiz ashliq karidori kélishimi teshkil qilidighanliqini tekitlep mundaq dédi: «qaradéngiz ashliq karidori kélishimi mesiliside ümidwarmen, yaki bu heqte men ümidsiz déyelmeymen, méning birdinbir déyeleydighinim shuki, qaradéngiz ashliq karidorini janlandurush iradem qetiydur.»
gutérrés rusiyege qaritilghan émbargolargha xilapliq qilmastin, rusiye ashliqi we oghutini, shundaqla ukraina ashliqini éksport qilishni eslige keltürüsh üchün her jehettin tirishchanliq körsitidighanliqini qeyt qildi.
bash katip gutérrés ukrainadiki tinchliq söhbiti heqqide toxtalghanda, muressechilik rolini oynash pursitidin intayin jursen ikenlikini eskertip mundaq dédi: «emma méningche biz yenila bu nuqtidin xélila yiraqtimiz.»
gutérrés ukrainada «herqandaq bir tinchliq» ni qollimaydighanliqlirini, emma birleshken döletler teshkilati ehdinamisi we xelqara qanunlargha mas kélidighan adil tinchliqni qollaydighanliqlirini tekitlidi.
