süriyede bir hepte ichide alte mingdin artuq adem köchüshke mejbur bolup qaldi
süriye armiyesi we uning qollighuchilirining idlibqa qilghan hujumliri netijiside yéqinqi bir hepte ichide 6000 din artuq puqra öy- makanliridin ayrildi.
türkiye awazi radiyosi xewiri: idlibtiki ayropilan resetxanisi bayanat élan qilip, süriye armiyesi bilen iranning qollishi astidiki térrorluq guruppilirining yéqinqi bir heptidin buyan idlibning jenubidiki yéza- kentlerge kem dégende 1360 qétim quruqluqtin hujum qilghanliqini, oxshash mezgilde, rusiye urush ayropilanlirining mezkur rayonlargha 46 qétim hawadin hujum qilghanliqini uqturdi.
hujumlar nuqtiliq halda idlibning jenubidiki fatitira, keferawid, kensafra, beynin, bara we belyun yéziliri bilen helebning gherbidiki kefertal we sehara qatarliq ahaliler rayonlirigha merkezleshtürüldi.
rayonda sanliq melumatlarni toplash bilen shughullinidighan süriye jiddiy ehwallargha taqabil turush xizmetlirini maslashturush orgini reisi muhemmed hellaj, hujumlarda besh puqraning hayatidin ayrilghanliqini, 10 puqraning yarilanghanliqini bildürdi.
hellaj bir hepte ichide 6382 puqraning öy- makanliridin ayrilghanliqini tilgha élip: «hujumlar saghlamliq merkezliri we mekteplerni öz ichige alghan jemiy 22 memuriy orunni zerbe obéykti qildi» dédi.
hujumlar tüpeylidin, kensafra, belyun, bara we keferawid yéziliridin idlibning shimalidiki rayonlargha köchüsh herikiti bashlandi.
