ukrainada herbiy komissarlar wezipisidin élip tashlandi

türkiye awazi radiyosi xewiri: ukraina pirézidénti zélénskiy dölet bixeterlik we mudapie kéngishining 2023-yili 11-awghusttiki «ukraina qoralliq qisimlirining rayonluq herbiylikke qobul qilish we ijtimaiy yardem merkezlirining tekshürüsh netijisi» toghrisidiki permanigha imza qoydi.

u 11-awghust (2023) tiki bayanatida, dölet bixeterlik we mudapie kéngishining alahide yighinida herbiy tarmaqlarni tekshürüsh netijisini muzakire qilghanliqlirini bildürüp: «herbiy tarmaqlarning mesullirigha qaritilghan jemiy 112 jinayi ishlar délosi we 33 guman bar. chiqarghan qararimiz boyiche, barliq rayonlarning herbiy komissarlirini wezipisidin qaldurduq» dégen idi.

u yéngi herbiy komissarlarning wezipige teyinlinishtin ilgiri ukraina bixeterlik idarisi teripidin tekshürülidighanliqini eskertken idi.

ukraina yerlik taratqulirining xewirige qarighanda, aldinqi ay (2023-yil iyul) da bezi rayonlarning herbiy komissarlirining herbiylikke qobul qilish jeryanida hoquqidin qalaymiqan paydilinip, para alghanliqi ashkarlanghan.

muxbirlar, odéssa herbiy komissari yéwgéniy borisofning ispaniyede qimmet bahaliq mal-mülükliri we heshemetlik aptomobillirining barliqini ashkarilighandin kéyin, borisof bir qisim kishilerning herbiy mejburiyet öteshke mas kelmeydighanliqini bildüridighan ispatlarni sétish jinayiti bilen eyiblinip qolgha élinghan idi.

qanun ijrachiliri yene, dnépropétrowisk herbiy komissarining 2022-yili 24-féwral bashlanghan ukraina-rusiye urushi jeryanida, dadisining namida bir qanche mashinini tizimgha aldurghanliqini we dnipro shehiride ikki turalghu sétiwalghanliqini ashkarilighan idi.