amérika türkiyening ashliq kélishimini eslige keltürüsh tirishchanliqigha yuqiri baha berdi
amérika qoshma ishtatliri türkiyening qara déngiz ashliq kélishimige qaytip kélishi üchün rusiyege bésim ishlitiwatqanliqidin memnun ikenlikini bildürdi.
türkiye awazi radiyosi xewiri: amérika tashqi ishlar ministirliqi bayanatchisi matéw millér rusiye pirézidénti wiladimir putinning awghusttiki türkiye ziyariti heqqidiki bir soalgha jawab bérip: «men bizning türkiyening rusiyeni qara déngiz ashliq karidori kélishimige qaytip kélishke qistash yolidiki rolini qarshi alidighanliqimizni dégendin bashqa, ziyaret toghrisida bir nerse démeymen» dédi.
u türkiyening ashliq karidro kélishimidiki roli heqqide toxtilip: «(türkiye emeldarliri) bashtin - axir bu heqte kélishim hasil qilish we rusiyeni kélishimni dawamlashturushqa qayil qilish jehette intayin ijabiy bolup keldi» dédi.
bayanatchi millér türkiyening ashliq kélishimini dawamlashturush mesilisidiki «ijadkar roli» ni dawamlashturushini arzu qilidighanliqlirini qeyt qildi.
jumhur reis erdoghan istanbulda muxbirlarning putinning türkiye ziyariti toghrisidiki bir soaligha jawab bérip: «waqti téxi mueyyenleshmidi. emma, tashqi ishlar ministiri, istixbarat idarisi bashliqi qatarliqlarning hemmisi söhbetlerni dawamlashturuwatidu. bu söhbetler dairiside bu ziyaret awghustta ishqa ashurulidu, dep oylaymen» dégenidi.
2022- yili 24 - iyun bashlanghan rusiye- ukraina urushining dunya ashliq bahasigha körsitidighan tesirini azaytish üchün, birleshken döletler teshkilati (b d t), rusiye, türkiye we ukraina 2022 – yili 22 – iyul istanbulda söhbet ötküzüp, qara déngiz ashliq karidori kélishimige imza qoyghanidi.
rusiye pirézidéntliq mehkimisi — kirémil bayanatchisi dimiriy péskow mudditi toshqan kélishim toghrisida 17 - iyul bayanat élan qilip: «ashliq karidori kélishimi resmiy axirlashti, toxtitildi. rusiye munasiwetlik shertler orundalghan haman derhal ashliq kélishimige qaytip kélidu. kélishimning rusiyege munasiwetlik qismi orundalmidi» dégenidi.
