blinkén: qara déngiz ashliq kélishimini «pursetperestlik» qorali qilip ishletti
amérika türkiye armiyesi antoni blinkén rusiyening qara déngiz ashliq kélishimini «pursetperestlik» qorali qilip ishletkenlikini ilgiri sürdi.
türkiye awazi radiyosi xewiri: amérika tashqi ishlar ministiri antoni blinkén birleshken döletler teshkilati (b d t) xewpsizlik kéngishining özi riyasetchilik qilghan «acharchiliq we toqunush keltürüp chiqarghan yer shari yémeklik ensizliki» témiliq yighindin kéyin, muxbirlarning soallirigha jawab bérip: «yémeklikning urush qorali süpitide ishlitilishige xatime bérishke wede bergen 91 dölet birleshme bayanat élan qildi. bu öz aldighila küchlük bir ibare, biz bashqilarnimu buninggha qatnishishqa teklip qilimiz» dédi.
rusiyening ukraina bilen bolghan urushta qara déngiz ashliq kélishimidin «pursetperestlik» qorali süpitide paydilanghanliqini we moskwaning buningdin waz kéchishi kéreklikini otturigha qoyghan blinkén, qara déngiz ashliqining ukraina üchünla emes, belki éghir acharchiliq xewpige duch kelgen dunyadiki herqaysi döletlerning ashliq éhtiyaji üchünmu muhim ikenlikini tekitlidi.
u rusiyening «kélishimni buzupla qalmastin, belki ukrainadiki ashliq ambarlirigha qesten hujum qilip» yémeklik ishlepchiqirishighimu tosqunluq qilghanliqini ilgiri sürdi we sözini dawamlashturup: «biz bashqa liniyelerni eng yuqiri chekke yetküzsekmu, ukrainaning qara déngiz ashliq kélishimi sayisida ishqa ashurghan miqdargha yétish tolimu müshkül» dégenlerni qeyt qildi.
rusiyening kélishimge qaytip kélishining «özi bilidighan ish» ikenlikini bildürgen bilinkén, b d t bash katibatliqi bilen türkiyening qara déngiz ashliq kélishimige körsetken tirishchanliqigha rehmet éytti.
2022- yili 22 - iyun bashlanghan rusiye- ukraina urushining dunya ashliq bahasigha körsitidighan tesirini azaytish üchün, birleshken döletler teshkilati (b d t), rusiye, türkiye we ukraina 2022 – yili 22 – iyul istanbulda söhbet ötküzüp, qara déngiz ashliq karidori kélishimige imza qoyghanidi.
rusiye pirézidéntliq mehkimisi — kirémil bayanatchisi dimiriy péskow mudditi toshqan kélishim toghrisida 17 - iyul bayanat élan qilip: «ashliq karidori kélishimi resmiy axirlashti, toxtitildi. rusiye munasiwetlik shertler orundalghan haman derhal ashliq kélishimige qaytip kélidu. kélishimning rusiyege munasiwetlik qismi orundalmidi» dégenidi.
