erdoghan bilen putin téléfonlashti
jumhur reis rejep tayyip erdoghan rusiye pirézidénti wladimir putin bilen téléfonlashti.
türkiye awazi radiyosi xewiri: türkiye jumhuriyiti jumhur reislik mehkimisi uchur – alaqe ishliri idarisining bildürüshiche, jumhur reis erdoghan bilen pirézidént putin téléfonliship, putinning türkiye ziyariti toghrisida birdeklik hasil qilghan.
jumhur reis erdoghan rusiyening türkiyening orman ot apitige qarshi turush kürishige yardem bérish meqsitide ewetken ikki ot öchürüsh ayropilani üchün, putingha rehmet éytqan hemde rusiyelik sayahetchilerning türkiyege bolghan qiziqishining künséri küchiyiwatqanliqidin memnun ikenlikini, bu yil (2023) namayan qilinghan ortaq tirishchanliqlar sayisida, sayahetchilikte rékortning buzulidighanliqigha ishinidighanliqini bildürgen.
jumhur reis erdoghan 2022- yili 24- féwraldin buyan dawam qiliwatqan rusiye- ukraina urushining nöwettiki jiddiy halitini éghirlashturuwétidighan qedemlerni tashlimasliqning zörürlükige isharet qilghan we «tinchliq köwrüki» dep qariliwatqan qara déngiz ashliq karidori kélishimining muhimliqini tekitligen.
«qara déngiz ashliq karidori» ning uzun muddet taqilishining héchkimge paydisi yoqluqini, bu ishta ashliqqa éhtiyajliq kirimi töwen döletlerning eng köp ziyangha uchraydighanliqini tilgha alghan jumhur reis erdoghan, ashliq kélishimi mezgilide %23 töwenligen danliq mehsulatlar bahasining kélishim tonglitip qoyulghan yéqinqi ikki hepte ichide %15 ashqanliqini eskertken.
erdoghan türkiyening qara déngiz ashliq karidori kélishimini eslige keltürüsh üchün, küchlük tirishchanliq körsitish we diplomatik xizmet ishleshni dawamlashturidighanliqini éytqan.
