nato döletliri: türkiyening ashliq kélishimini eslige keltürüsh tirishchanliqini qollaymiz
shimaliy atlantik ehdi teshkilati — natogha döletler türkiye we bashqa ittipaqdashlirining qara déngiz ashliq kélishimni eslige keltürüsh yolidiki tirishchanliqini qarshi alidighanliqini bildürdi.
türkiye awazi radiyosi xewiri: nato - ukraina kéngishi yighin chaqirip, rusiye türkiye bilen birleshken döletler teshkilati (b d t)ning muresseleshtürüshi netijiside hasil qilinghan qara déngiz ashliq kélishimidin chékinip chiqqandin kéyin, rayonda peyda bolghan «éghir bixeterlik weziyiti»ni muzakire qildi.
nato — ukraina kéngishi 11-, 12 – iyul künliri échilghan litwaniye paytexti wilnyustiki bashliqlar yighini jeryanida qurulghandin buyanqi ikkinchi yighinini tünügün bélgyening paytexti biryusséldiki nato bash ishtabida bash elchiler derijiside achti.
nato yighindin kéyin bayanat élan qilip, rusiyening kélishimdin chékinish qarari we ukrainaning ashliq éksportini toxtitishqa urunushi, ukrainadiki port sheherliri we ashliq ambarlirigha qilinghan hujumlarning ittipaqdashlar we ukraina teripidin eyiblengenlikini bildürdi.
bayanatta bash katip yéns stolténbérgning: «qara déngizdiki xeterlik we jiddiychilikni ulghaytquchi heriketlerning barliq jawabkarliqi rusiyede. rusiye achliqni qoral qilip ishlitishni we dunyadiki eng ajiz kishilerge yémeklik muqimsizliqi bilen tehdit sélishni toxtitishi kérek. rusiyening qilmishliri, oxshash waqitta, natogha nisbeten istratégiyelik ehmiyetke ige qara déngiz rayonining muqimliqigha éghir tehdit élip kelmekte. ittipaqdashlar ukrainagha bolghan qollash we hoshyarliqni kücheytmekte. biz ittipaq térritoriyesining her bir santimétirini her qandaq hujumdin qoghdashqa teyyarmiz» dégen ibarilirige orun bérildi.
bayanatta yene: «ittipaqdash döletler türkiyening ashliq kélishimini eslige keltürüsh yolidiki tirishchanliqini, shundaqla bulghariye we rominiye qatarliq bashqa ittipaqdashlirining, yawropa ittipaqi we b d t ning ukraina ashliqini quruqluq we déngiz arqiliq éksport qilish tirishchanliqini qarshi alidu» déyildi.
nato we uning ittipaqdashlirining déngiz charlash ayropilanliri we uchquchisiz hawa apparatliri arqiliq qara déngizdiki razwédka qilish we közitish paaliyetlirini kücheytkenlikige isharet qilinghan bayanatta, rusiye ukrainagha hujum qilghandin kéyin, natoning rayondiki mewjutluqini kücheytkenliki qeyt qilindi.
