qatar bilen pakistan démokratiye we milliy ittipaq künini tebriklidi

türkiye awazi radiyosi xewiri: qatar resmiy xewer agéntliqi — QNA, emir temimning 2016- yili 15 – iyul küni meydangha kélip meghlubiyetke uchrighan  herbiy – siyasiy özgirish qozghashqa urunush herikitining 7 – xatire yili munasiwiti bilen, jumhur reis rejep tayyip erdoghangha télégramma yollap, démokratiye we milliy ittipaqliq künini tebrikligenlikini xewer qildi.

qatar bash ministiri, qoshumche tashqi ishlar ministiri muhemmed bin abdurrahman bin jasim al sanimu jumhur reis erdoghangha mektup yollap, «15-iyul démokratiye we milliy ittipaqliq küni»ni tebriklidi.

pakistan bash ministiri shahbaz sherifmu tiwittérdiki adrésida türkche uchur hembehrilep: «pakistan bügün démokratiye we milliy ittipaqliq künining yettinchi xatire yilini tebriklesh paaliyetliride qérindash türkiye xelqi we hökümiti bilen birge turmaqta» dédi.

qehriman türk xelqining yüksek pidakarliqini eslep ötken sherif, uchurida: «biz xelqni démokratiye we asasiy hoquqlardin mehrum qilishqa urunush qilmishigha baturluq bilen qarshiliq körsetken shéhitlirimizni hörmet we minnetdarliq bilen xatirileymiz. 2016- yilidiki bu tarixiy we bösüsh xaraktérlik kün qérindishim jumhur reis rejep tayyip erdoghanning hayatiy küchige tolghan tewrenmes rehberlikige bolghan chongqur ishenchke wekillik qilidu. bu kün, milletlerning ittipaqliq, qérindashliq we chongqur rishtilerning küchi sayisida her qandaq xiris üstidin ghalib kéleleydighanliqini körsitip béridu» dégen ibarilerge orun berdi.