yawropa döletliri köchmenler we panahlanghuchilar belgilimisi mesiliside kélishelmidi
polsha bilen wéngiriyening qarshiliqi sewebidin yawropa ittipaqi yéngi ortaq köchmenler we panahlinish belgilimisi toghrisidiki talash- tartishni hel qilalmidi.
türkiye awazi radiyosi xewiri: bélgiyening paytexti biryussélda ikki kün dawamlashqan yawropa ittipaqi bashliqlar yighinida, yawropa ittipaqi rehberliri köchmenler toghrisidiki birleshme bayanatni qobul qilalmidi.
yawropa ittipaqi komitéti teripidin otturigha qoyulghandin kéyin, mushu ayning béshida köp sanliq teripidin qobul qilinghan «ittipaqliq méxanizmi»ning köchmenlerning yawropa ittipaqidiki her bir döletke mejburiy teqsimlinishini, eksiche bolghanda, eza döletlerning her bir köchmen üchün 20 ming yawro tölishini mezmun qilghan belgilimisige polsha bilen wéngiriye étiraz bildürdi.
bashliqlar yighinining küntertipidiki bashqa mesililer toghrisida birleshme bayanat élan qilinghan bolsimu, köchmenler toghrisida peqet yawropa kéngishi reisi charléz mishélning imzasi bilen birla höjjet tarqitildi.
mishél mezkur höjjette «polsha bilen wéngriyening ünümlük köchmenlik we panahlinish siyasiti mesiliside yarishishqa éhtiyajining barliqini, ittipaqliq tedbirliri dairiside köchmenlerning teqsimlinishining pidakarliqni asas qilishi kéreklikini otturigha qoyghanliqi qeyt qilindi» dégen ibarilerge orun berdi.
mishél bashliqlar yighini axirlashqandin kéyin ötküzülgen muxbirlarni kütüwélish yighinida, ukrainaliq musapirlarni köplep qobul qilghan wéngiriye bilen polshaning yéngi qaidilerning layaqetlik köp sanliqlar teripidin emes, birdek maqullinishini telep qilghanliqini, ularning telipige asasen özgertilgen ortaq bayannamige imza qoyulmighanliqini bildürdi.
