xelqara jemiyet shiwétsiyediki quran kerimni köydürüsh qilmishigha naraziliq bildürdi

türkiye awazi radiyosi xewiri: birleshken döletler teshkilati medeniyetler ittipaqining yuqiri derijilik wekili miguél angél moratinos yazma bayanat élan qilip, stokholmdiki bir jamening aldida quran kerimning köydürülgenlikini qattiq eyiblidi.

u qebih qilmishning qurban héytini tebriklewatqan musulmanlargha qilinghan éghir hörmetsizlik ikenlikini tekitlidi.

pikir erkinlikining muhimliqini, emma muqeddes kitablar, orunlar we belgilerge hörmetsizlik qilishni qobul qilghili bolmaydighanliqini bildürgen moratinos: «bu xil qilmishlar zorawanliqni keltürüp chiqiridu» dédi.

islam hemkarliq teshkilatimu kéler hepte seudi erebistanning jidde shehiride pewquladde yighin chaqirip, bu weqeni muzakire qilidu.

yighinda shiwétsiyede qurban héytning birinchi küni sadir qilinghan <quran kerimning köydürülüshi weqesi>ge qarshi tashlinidighan qedemlerning muzakire qilinidighanliqigha isharet qilinghan bayanatta, «yighin bu peskesh qilmishqa qarshi yolgha qoyulidighan tedbirlerni muzakire qilish we quran kerimge qilinghan hörmetsizlikke bildürülidighan ortaq pozitsiyeni békitshni meqset qilidu» dégen ibarilerge orun bérildi.

iranmu shiwétsiyening quran kerimni köydürüsh qilmishigha ruxset qilishigha naraziliq bildürüp, shiwétsiyening téhrandiki diplomatini tashqi ishlar ministirliqigha chaqirtti.

iraqning paytexti baghdadta bir türküm namayishchilar quran kerimning köydürülüshige naraziliq bildürüp, shiwitsiye elchixanisigha bésip kirdi.

amérika tashqi ishlar ministirliqi hem quran kerimning köydürülüshini eyiblidi hemde bu heriketke yol qoyushqa «pikir erkinliki» dep baha berdi.

shimaliy qibris türk jumhuriyiti jumhur reisi ersin tatar ijtimaiy taratqudiki adrésida shiwétsiyede sadir qilinghan quran kerimni köydürüsh qutratquluqigha qattiq naraziliq bildürüp: «men dinlarning muqeddes amillirigha hujum qilishni erkinlik dep qaraydighan rohiy haletni qattiq eyibleymen» dédi.

dunya musulman ölimalar birleshmisi bash katipi eli muhiddin qaradaghimu shiwétsiye hökümitining quran kerimni köydürüshtek qebih qilmishqa yol qoyushini eyibligen yazma bayanatida: «bu erkinlik emes, irqchiliqtur. hökümet organliri qollighan yekke wehshiyliklerge süküt qilmasliq kérek» dégen ibarilerge orun  berdi.

iyordaniyemu quran kerimge qilinghan hujumni eyiblidi hemde uninggha «qobul qilghili bolmaydighan qutratquluq we irqchiliq qilmishi» dep baha berdi.

yene bir tereptin, iyordaniye tashqi ishlar ministirliqi shiwétsiyening ammandiki bash elchisi aléksandra ridmarkni ministirliqqa chaqirip, ultimatom tapshurdi.

pelestin tashqi ishlar ministirliqi quran kerimni köydürüsh qilmishining «islam dini we quran kerimge bolghan öchmenlik we irqchiliqning ipadisi» ikenlikini tekitlidi.

seudi erebistan, kuweyt, marakesh, yemen we liwanmu quran kerimge qilinghan hörmetsizlikni eyiblidi.

undin bashqa, marakesh quran kerimni köydürüsh qilmishi sewebidin stokholmda turushluq bash elchisini kéngishish üchün qerelsizla dölitige qayturup keldi hemde shiwétsiyening rabatta turushluq diplomatik wekilini tashqi ishlar ministirliqigha chaqirtti.

ereb parlaméntimu quran kerimni köydürüsh qilmishigha naraziliq bildürüp, islam dunyasini «shiwétsiye mallirini bayqut qilishqa, u döletke sayahetke barmasliqqa we estayidil pozitsiye bildürüsh»ke chaqirdi.

pakistan tashqi ishlar ministirliqimu shiwétsiyening paytexti stokholmdiki bir jamening aldida sadir qilinghan quran kerimni köydürüsh qilmishini qattiq eyiblidi hemde uninggha «peskesh qilmish» dep baha berdi؛ pikir erkinlikining dinlar ara inaqliqni buzushqa we öchmenlik tarqitishqa yol qoymaydighanliqi otturigha qoyulghan bayanatta, pakistanning endishisini shiwétsiye dairilirige yetküzgenliki qeyt qilindi.

amérika tashqi ishlar ministirliqimu bu qebih qilmishqa «hörmetsizlik we renjide qilghuchi» dep baha berdi.

shiwétsiyening paytexti stokholmdiki stokholm jamesi aldida iraqliq salwan momika saqchilarning qoghdishi astida quran kerimni köydürgenidi.