türkiye rehberliri roytérs agéntliqigha qattiq naraziliq bildürdi
roytérs agéntliqining dölitimiz (türkiye jumhuriyiti) jumhur reisi rejep tayyip erdoghan we ailisini hujum nishani qilghan xewirige, türkiye rehberliri qattiq naraziliq bildürdi.
türkiye awazi radiyosi xewiri: türkiye muawin jumhur reisi jewdet yilmaz ammiwi ortaqlishish tor bétidiki sehipiside élan qilghan bayanatida, roytérs agéntliqining xewirini qattiq eyiblep mundaq dédi: «shimaliy atlantik ehdi teshkilati bashliqlar yighini harpisida jumhur reisimiz rejep tayyip erdoghanning oghli hörmetlik bilal erdoghan ependi heqqide aldamchiliq bilen saxta xewer tarqatqan roytérs agéntliqini qattiq eyibleymen. hemme shuni bilishi kérekki, türkiye jumhuriyiti xelqara qanungha asasen özining milliy menpeetlirini chiqish nuqta qilghan halda heriket qilidu.»
türkiye edliye ministiri yilmaz tunch ammiwi ortaqlishish tor bétidiki sehipiside élan qilghan bayanatida, roytérs agéntliqini eyiblep mundaq dédi: «bu oydurma xewer axbarat erkinlikining chek - chégrasidin halqip ketkenlikining eng roshen namayendisi bolup, bu xewer tetür teshwiqattin bashqa nerse emes.»
«ey roytérs agéntliqi! xewiringlarda hem <bu xewerning rastliqini jezmleshtürelmiduq> depsiler, hemde shundaq bolushigha qarimay jezmleshtürelmigen mezmunlarni xewerleshtürüsh arqiliq jumhur reisimiz rejep tayyip erdoghan we uning ailisidikilerning shan – sheripini depsende qilish üchün suyiqest qilmaqchi bolupsiler. halbuki, démokratik döletler we xelqara qanunlarda axbarat erkinlikining chek – chégraliri intayin éniqtur. bu nuqtidin élip éytqanda, saxta xewerler arqiliq shexsiy heq – hoquqlarning depsende qilinishini qetiy qobul qilghili bolmaydu.»
türkiye jumhur reislik mehkimisi uchur - alaqe ishliri idarisining bashliqi fahrettin altun roytérs agéntliqining mezkur xewirining tetür teshwiqatning mehsuli ikenlikini eskertip mundaq dédi: «roytérs agéntliqining asassiz dewalar we tetür teshwiqatlar bilen tolup tashqan atalmish xewiri axbarat tarixidiki qara dagh, shundaqla 171 yashliq tarixqa ige roytérs agéntliqining özini ochuq-ashkara halda kemsitkenlikining échinishliq misalidur.»
«shuni alahide tekitlep ötimizki, türkiyege bésim ishlitish meqsitide türkiyege qarshi bir qisim jemiyetler, shexsler we axbarat organliri teripidin tarqitiliwatqan bu oydurma xewer türkiyening pirinsipal meydanigha hergizmu ziyan yetküzelmeydu.»
u bu oydurma xewerning shimaliy atlantik ehdi teshkilati-nato bashliqlar yighini harpisida tarqitilishining diqqet qozghaydighanliqinimu sözlirige ilawe qildi.
