rusiye bilen wagnér bixeterlik shirkiti otturisida kirizis yüz berdi
rusiye bixeterlik (yallanma eskerler) shirkiti «wagnér»ning qurghuchisi yéwgéniy prigojin rusiye armiyesini wagnérgha hujum qilish bilen eyiblep, özlirining inkas qayturush üchün heriketke ötkenlikini bildürdi.
türkiye awazi radiyosi xewiri: prigojin özining télégramma supisidiki qanilida bayanat élan qilip, rusiye armiyesining wagnérning gazarmilirigha hujum qilip, nurghun wagnér eskirini öltürgenlikini ilgiri sürdi.
u wagnérning buninggha jawab qayturidighanliqini tekitlep: «bügün bizning ademlirimizni öltürgen we onminglighan rusiye eskirining ölüshini keltürüp chiqarghanlar jazalinidu. aldimizgha chiqqan her qandaq ademni tehdit dep qarap, derhal yoqitimiz. bizning yolimizni torashqa urunmanglar. biz bashlighan ishimizni tügetkendin kéyin, aldinqi sepke qaytip, wetinimizni qoghdashni dawamlashturimiz» dédi.
rusiye dölet mudapie ministirliqi bayanat élan qilip, ijtimaiy taratqulardiki wagnér gazarmilirigha munasiwetlik ikenliki ilgiri sürülgen körünüshlerning «saxta» we «ighwagerchilik»tin ibaret ikenlikini bildürdi؛ bayanatta: «pirigojin we uning qollighuchilirining qilghini qoralliq topilangdur» déyildi.
rusiye döletlik térrorluqqa qarshi turush komitétimu bu heqte bayanat élan qilip, prigojinning sözlirining toghra emesliki eskertti we «fédératsiye bixeterlik idarisi qoralliq topilang chaqiriqi élan qilghanlar üstidin jinayi ishlar erznamisi sundi. biz bu qanunsiz heriketlerge derhal xatime bérilishini telep qilimiz» dégenlerni qeyt qildi.
kirizis sewebidin rusiyening ukraina chégrasigha yéqin rayonlirida bixeterlik tedbirliri kücheytildi, yéwgéniy prigojin bashchiliqidiki wagnér guruppisi rostof-na donudiki rusiye jenub herbiy rayon qomandanliq merkizini qorshiwaldi.
prigojin özlirining rostowdiki herbiy ayrodurumni öz ichige alghan herbiy orunlarning kontrolluqini qollirigha alghanliqlirini bildürdi.
rusiye fédératsiye bixeterlik idarisi wagnér ezalirini xataliq ötküzmeslikke, prigojinning jinayet xaraktéridiki buyruqlirigha boysunmay, uni derhal nazaret astigha élishqa chaqirdi.
