xelqara jemiyet rusiyediki özgirishlerni yéqindin közetmekte

türkiye awazi radiyosi: yawropa ittipaqi kéngishi reisi charliz mishél wagnér guruppisining rusiye hökümitige qarshi qozghilang kötürüshidin kéyin bashlanghan weqelerni yéqindin közitiwatqanliqini, emma buning rusiyening ichki mesilisi ikenlikini bildürdi.

mishél tiwittérdiki adrésida uchur hembehrilep, yawropa ittipaqining rusiyediki özgirishlerni yéqindin közitiwatqanliqini otturigha qoydi hemde öziningmu yawropa rehberliri we yette dölet guruhidiki shérikliri bilen alaqileshkenlikini eskertkendin kéyin, bu weqening «rusiyening ichki mesilisi» ikenlikini éytti.

mishél yene: «bizning ukraina we ukraina pirézidénti wiladimir zélénskiyni qollishimizda tewrinish yoq» dégenlerni qeyt qildi.

amérika rusiye bilen rus bixeterlik shirkiti — wagnér otturisidiki özgirishlerni yéqindin közitiwatqanliqini bildürdi.

CNN xewerler qanili aqsaray dölet bixeterlik kéngishi bayanatchisi adam xodjning rusiye dölet mudapie ministiri sérgéy shoygugha doél élan qilghan wagnérning qurghuchisi yéwgéniy prigojinning «qoralliq teshkilatining ukraina chégrasidin ötüp, rusiye tewelikige kirgenliki» toghrisida toxtilip: «özgirishlerni közitiwatimiz. amérika pirézidénti jo baydinmu weqedin waqiplanduruldi» dégenlikini xewer qildi.

xewerde körsitilishiche, bayanatchi xodj ittipaqdash we shérik döletler bilen rusiyediki özgirishlerni muhakime qilidighanliqlirini bildürgen.

polsha pirézidénti andréj dudamu bash ministir matéz morawiyékki we dölet mudapie ministirliqi emeldarliri bilen rusiyede yüz bergen eng yéngi özgirishlerni muzakire qilghanliqini bildürüp: «sherqiy chégramizning u teripidiki weqeler izchil közitiliwatidu» dédi.

duda tiwittér adrésida uchur hembehrilep, rusiyediki özgirishler toghrisida ittipaqdash döletler bilenmu sözleshkenliklirini bildürdi.

finlandiye pirézidénti sauli niinisto wagnér guruppisining rusiye hökümitige qarshi isyan kötürüshining «rusiyening ichki mesilisi» ikenlikini tilgha élip: «rusiyediki özgirishler finlandiye we bashqa jaylarda yéqindin közitilmekte. pirézidént (wiladimir) putinning sözi weziyetning éghirliqini körsitip béridu» dédi.

latwiye tashqi ishlar ministiri édgars rinkéwichmu weqe toghrisida toxtilip: «rusiyediki özgirishlerni yéqindin közitiwatimiz. alaqidar organlar hazir weziyet we zörür bolghan qoshumche bixeterlik tedbirlirini muhakime qiliwatidu» dédi.

rinkéwich latwiyening puqralirini rusiye we bélarusiyege barmasliqqa we u yerdiki puqralirini eng qisqa waqit ichide bashqa döletlerge chiqip kétishke chaqirghanliqini tekitlidi.

rusiye bixeterlik shirkiti wagnérning qurghuchisi yéwgéniy prigojin rusiye armiyesini wagnér gazarmilirigha hujum qilish bilen eyiblep, shirketning intiqam élish üchün heriketke ötkenlikini éytqanidi.

bu bayanattin kéyin, rusiye fédératsiye bixeterlik idarisi wagnér üstidin «qoralliq topilang kötürüsh» jinayiti sadir qilghanliqi toghrisida sot mehkimisige erz sunghanidi.

rusiye dölet mudapie ministirliqi wagnérning «rusiye armiyesi gazarmilirimizgha hujum qildi» dégen eyibleshlirini ret qilghanidi.