xitay bash ministiri li chyang parizhda yawropa ittipaqi kéngishi reisi charléz mishél bilen körüshti
xitay bash ministiri li chyang dölitining tereqqiyatining yawropa we dunyaning bashqa jaylirigha xeter emes, belki purset élip kélidighanliqini éytti.
türkiye awazi radiyosi xewiri: shinxua agéntliqi bash ministir li chyangning firansiyening paytexti parizhda ötküzülgen «yéngi yershari pul - muamile shertnamisi bashliqlar yighini» jeryanida yawropa ittipaqi kéngishi reisi charléz mishél bilen körüshkenlikini xewer qildi.
xewerde körsitilishiche, li chyang körüshüshte, xitay bilen yawropa ittipaqi otturisida tüpki menpeet toqunushi yoqluqini, bir terepning tereqqiyatining yene bir terepke paydiliq ikenlikini otturigha qoyghan.
u xitay bilen yawropaning istratégiyelik erkinlik we köp tereplimilikni ching tutush arqiliq özara ishenchni tereqqiy qildurushi kéreklikini tekitlep: «bu xil pozitsiye xitay bilen yawropaning ortaq tereqqiyatigha, dunyawi xirislargha ortaq taqabil turush hemde köp qutupluq dunya berpa qilishqa töhpe qoshidu» dégen.
u yene yawropa ittipaqining xitay bilen bolghan munasiwitini obyéktip we eqliy muhakime qilishini, emeliy hemkarliqni puxta asasta dawamlashturushini ümid qilidighanliqini bildürgen.
yawropa ittipaqi kéngishi reisi charléz mishél xitayning tereqqiyatining yawropa ittipaqi we dunya üchün paydiliq ikenlikige isharet qilip, yawropa ittipaqining xitayning tereqqiyatini basturushni meqset qilmaydighanliqini we «yéngi soghuq munasiwetler urushi»gha qarshi ikenlikini eskertken.
terepler söhbet jeryanida ukraina kirizisi toghrisidimu pikir almashturghan.
