stolténbérg: xam eshyada xitaygha tayinishni tereqqiy qildurmasliq kérek
nato bash katipi stolténbérg ittipaqning armiyediki herbiy ünümini töwenletmestin, kilimat özgirishige qarshi turush nishani bilen maslishishi kéreklikini bildürdi.
türkiye awazi radiyosi xewiri: nato bash katipi stolténbérg bélgiye paytexti biryussélda merkizi amérikagha jaylashqan gérmaniye marshal fondi uyushturghan «kilimat we xewpsizlik konféransi» da söz qildi.
u sözide, kilimat özgirishige taqabil turush we ittipaqdashlarning bixeterliki üchün «yéshil énérgiye» ge ötüshni kapaletlendürüshning muhimliqini tekitlidi.
u natoning herbiy ünümige tesir yetküzmey, armiyening küchlük bolghinidek «yéshil» bolushi kéreklikini ilgiri sürdi.
u tankilar, herbiy paraxotlar we herbiy ayropilanlarning «kilimat dosti emes» likini, ularning tashqa aylanghan yéqilghudin köp paydilinidighanliqini bildürüp: «eger biz yer sharida bulghima gaz qoyup bérishni nölge chüshürüshni emelge ashurmaqchi bolsaq, herbiy paaliyetlerde qoyup bérilidighan bulghima gaz miqdarini azaytishimiz kérek. shunga, biz téxnikini tereqqiy qildurushimiz kérek» dédi.
u natoning bu jehette toghra yolda ikenlikini eskertip, kanadada yéngiliq yaritish meblighige ige kilimat özgirish merkizining barliqini, bu yerde herbiy iqtidargha paydisiz tesir körsetmestin, bulghimini azaytishning yolliri üstidiki tetqiqatlarning we analizlarning köpiyiwatqanliqini qeyt qildi.
u ukraina urushining, énérgiye bixeterliki bilen kilimat özgirishige qarshi turushning qanchilik zich baghlanghanliqini körsitip bergenlikini tekitlep, rusiyening néfit we tebiiy gazigha tayinishni azaytip, qayta hasil bolidighan énérgiyege meblegh sélishning muhimliqini tekitlidi.
u buning bilen bir waqitta yene, ittipaqdashlirini xam eshyada xitaygha oxshash döletlerge tayinishni tereqqiy qildurmasliq kérekliki toghrisidimu agahlandurdi.
u yawropa ittipaqi bilen amérika we natoning özgiche xam eshya ishlepchiqirish we qaysi téxnikilarni ishlitish mesiliside hemkarlishishi kéreklikini tekitlidi.
