rusiye üchün jasusluq qilghan amérikaliq türmide ölük halda bayqaldi
amérikada rusiye üchün jasusluq qilish jinayiti bilen muddetsiz qamaq jazasigha höküm qilinghan fédératsiye tekshürüsh idarisi (FBI) ning 79 yashliq sabiq xadimi robért xansén türmide qaza qildi.
türkiye awazi radiyosi xewiri: amérika merkiziy téléwiziye istansisi <CBC News> ning xewirige asaslanghanda, amérika türme idarisining xewerlishish diréktori kristi bréshérs élan qilghan bayanatida, amérikada rusiye üchün jasusluq qilghanliqi sewebidin muddetsiz qamaq jazasigha höküm qilinghan xansénning hujrisida heriketsiz halda bayqalghanliqini, türme xadimlirining jiddiy qutquzushqa xewer qilghanliqini bildürüp: «mehbusning ölüm xewiri jiddiy qutquzush xadimliri teripidin élan qilindi» dep malumat bergen.
xansén 1979-yildin étibaren yuqiri derijilik mexpiy höjjetlerni sabiq sowét sotsiyalistik jumhuriyetler ittipaqigha we andin rusiyege sétip bérish bilen eyiblengen idi.
jinayitini étirap qilghan xansén 2001-yili fédératsiye sot mehkimisi teripidin jasusluq jinayiti bilen muddetsiz qamaq jazasigha höküm qilinghan idi.
xansénning jasusluq qilish jeryanida «Ramon Garcia» dep leqem ishletkenliki we 1milyard 400 milyon dollardin artuq neq pul, almas shundaqla chet el banka cheklirige minglighan mexpiy höjjetlerni satqanliqi melum.
2001-yili wirjiniye ishtatidiki bir baghchida jasusluq qiliwatqan peytte qolgha élinghan xansénning kimliki, bir rusiye istixbarat xadimi xansénning barmaq izi bar exlet xaltisi we awaz lintisi qatarliq höjjetlerni amérikagha tapshurghandin kéyin éniqlanghan idi.
