zélénskiy: urush biz ghelibe qilghanda axirlishidu
ukraina pirézidénti wolodimir zélénskiy: «urush biz ghelibe qilghanda axirlishidu. rusiye bu urushni baldur axirlashturalishi mumkin, buning üchün bizning zéminlirimizdin chiqip kétishi kérek» dédi.
türkiye awazi radiyosi xewiri: ukraina pirézidénti wolodimir zélénskiy yawropa siyasiy teshkilatliri bashliqliri yighinigha qatnishish üchün moldowagha yétip bardi.
u yighin échilidighan mimi qeleside moldowa pirézidénti maya sandu teripidin qizghin kütüwélindi. u bu yerde urushning qachan axirlishidighanliqi üstide toxtilip: «urush biz ghelibe qilghanda axirlishidu. rusiye bu urushni baldur axirlashturalishi mumkin, buning üchün bizning zéminlirimizdin chiqip kétishi kérek» dédi.
u yawropa siyasiy teshkilatliri bashliqliri jeryanida bezi rehberler bilen ayrim söhbetliship, dölitige «wetenperwer» namliq bashqurulidighan bombini öz ichige alghan herbiy yardemlerning bérilishini telep qilidighanliqini bildürdi.
u ukrainaning yawropa ittipaqi we natogha eza bolusi üstide toxtalghanda: «kélechikimizning yawropa ittipaqida ikenlikige ishinimiz. ukrainamu shimaliy atlantik ehdi teshkilatigha kirishke teyyar. biz shimaliy atlantik ehdi teshkilatining ukrainanimu öz ichige élishini ümid qilimiz. yawropa ittipaqi we natogha eza bolush, rusiyening ukrainagha qarshi qozghighan tajawuzchiliq urushi, shundaqla yawropaning bashqa yerlirige hujum qilish éhtimali sewebidin ukraina üchünla emes, belki moldowa üchünmu muhim» dédi.
u yawropa siyasiy teshkilatliri bashliqliri yighinidimu, ukrainaning rusiyege qarshi muhim bolghan natogha eza bolushtek bixeterlik kapaletlirige éhtiyajliq ikenlikini tekitlidi.
u bu heqte: «bu yaz wilniyusta échilidighan nato bashliqlar yighinida, ukrainaning ezaliqqa ochuq-ashkara teklip qilinishi we nato ezaliqi yolida bixeterlik kapaletliri bérilishi kérek» dédi.
u zamaniwi urush ayropilanlirigha éhtiyajliq ikenliklirini, «F-16» ayropilanliri bérilgen teqdirde rusiyeni yéngeleydighanliqlirini tekitlidi.
