jenubiy koréye bilen yéngi zélandiye munasiwetlirini kücheytishni qarar qildi
jenubiy koréye tashqi ishlar ministiri park jin we yéngi zélandiye tashqi ishlar ministiri nanaya maxuta (Nanaia Mahuta) ikki dölet munasiwetlirini tereqqiy qildurush we dunyawi mesililerde özara hemkarliqlarni kücheytish toghrisida özara pikir almashturdi.
türkiye awazi radiyosi xewiri: yonxap agéntliqining xewiride bildürülishiche, jenubiy koréye ministirliqi bayanat élan qilip, park jin we maxutaning «jenubiy koréye-tinch okyan aralliri rehberler yighini» ramkisida bir yerge jem bolghanliqini bildürgen.
ikki ministirning tinch okyan rayonidiki hemkarliqi, iqtisadiy, soda we koréye yérim aralliri weziyitining muzakire qilinghanliqi eskertilgen bayanatta, park jin we maxuta ortaq meniwiyetlerge tayanghan hemkarliqlarni tereqqiy qildurushta kélishim hasil qilghanliqi qeyt qilindi.
bayanatta yene, ikki minstirning dijital soda, bilim we téxnologiye saheliridiki munasiwetlerni kücheytish toghrisida wede bergenliki eskertildi.
jenubiy koréye pirézidénti yun sukyéol sahibxanliqida ötküzülgen «jenubiy koréye-tinch okyan aralliri rehberler yighini» da, rehberler yighinning birinchi künide kilimat özgirishi we tereqqiyat mesililirini muzakire qildi.
yighindin kéyin séul hökümiti we 17 aral döliti teripidin élan qilinghan ortaq xitabnamede, jenubiy koréye we tinch okyan döletlirining kilimat özgirishige qarshi küresh we tereqqiyatni asas qilghan, shundaqla bashqa sahelerdimu hemkarliqlarni ilgiri sürüshni qarar qilghanliqi qeyt qilinghan idi.
mezkur yighin 29-maydin 30-mayghiche «ortaq bayashadliq yolida ilgirilesh: kök tinch okyan bilen hemkarliqlarni kücheytish» témisi astida ötküzüldi. yighingha, 17 dölet qatnashqan bolup, 12 döletning dölet bashliqi, besh döletning munasiwetlik ministirliri ishtirak qildi.
