yawropa ukrainani qoral-yaragh bilen teminleshni tézleshtürdi

türkiye awazi radiyosi xewiri: yawropa ittipaqi tashqi munasiwetler we bixeterlik siyasiti aliy wekili josép borrél yawropa ittipaqi döletlirining dölet mudapie ministirlirini bir yerge jem qilghan yighindin kéyin, muhim bayanatlarni élan qildi.

u ukraina telep qilghan qoral-yaragh we oq-dorilarni bérish üchün yawropa ittipaqi 20-mart (2023) qobul qilghan üch basquchluq pilanning eng yéngi ehwali üstide toxtilip, bu ramkida hazirghiche ukrainani 220 ming zembirek oqi we 1300 dane bashqurulidighan bomba bilen teminligenliklirini, bu jeryanning 31-may (2023) da axirlishidighanliqini bildürdi.

u ikkinchi basquch süpitide pilan qilinghan ortaq sétiwélish üchün 1 milyard yawroluq tedbirning 800 milyonluq qismining hazirning özide kapaletke ige qilinghanliqini eskertip, sekkiz döletning bu mesilide öz arzusini ipadiligenlikini qeyt qildi. emma, bu döletlerning ismini ashkarilimidi.

u yawropa ittipaqining hazirghiche ukrainaning 20 mingdek eskirini terbiyeligenlikini, bu reqemning yil axiridin bashlap 30 minggha chiqidighanliqini bildürdi.

yawropa ittipaqi 20-martta üch basquchluq qararni qobul qilghan bolup, 1 milyard yawroluq maliye pilanini testiqlighan idi.

yawropa ittipaqi komitéti 3-may yawropa mudapie sanaitining iqtidarini kücheytish üchün oq-dora ishlepchiqirish qanun teklipini sunghan. bu dairide, yawropa ittipaqi xamchotidin 500 milyon yawro ajritilidighanliqi élan qilinghan idi.

üch basquchluq qarar, yawropa ittipaqi döletlirining yil axirighiche ukrainagha 1 milyon zembirek oqi ewetish üchün ortaq teminlesh ishlirining süritini tézleshtürüshni meqset qilmaqta.