yawropa kéngishi rusiyeni urush jinayiti üchün jawabkarliqqa tartish heqqide qedem tashlidi
yawropa kéngishining 4-nöwetlik bashliqlar yighinida rusiyeni ukrainadiki urush jinayiti tüpeyli jawabkarliqqa tartishning deslepki qedimi süpitide bir méxanizm ornitish qarar qilindi.
türkiye awazi radiyosi xewiri: yawropa kéngishining islandiyening paytexti réykyawikta chaqirilghan 4 – nöwetlik bashliqlar yighinining axirida, 46 eza döletning wekilliri, shundaqla kanada, yaponiye, amérika qoshma ishtatliri we yawropa ittipaqi birleshme bayannameni imzalidi.
bayannamege asasen, rusiyening ukrainagha keltürgen ziyini üchün tölem tölishining deslepki qedimi süpitide «ziyanni éniqlap chiqish» méxanizmi ornitildi.
bu méxanizm 2022-yili 2-ayning 24-küni urush bashlanghandin buyan dawamlishiwatqan hujumlar netijiside ziyangha uchrighan barliq kishiler, ukraina döliti tartqan barliq ziyanlar toghrisida delil-ispat we höjjetlerni toplaydu.
rehberler bir telep heyiti we tölem meblighinimu öz ichige alghan méxanizimni kéngeytish üchün xizmet ishlesh toghrisida birdeklik hasil qildi.
tajawuzchiliq jinayetliri üchün mexsus sot kollégiyesi qurush xizmitige munasiwetlik ilgirileshlerdin intayin xursen ikenlikini bayan qilghan rehberler rusiyeni bolupmu balilarni öz ichige alghan mejburiy köchürülgen ukraina puqralirini derhal qoyup bérishke chaqirdi.
rehberler ayrim bir bayanname arqiliq, rusiye armiyesi teripidin qanunsiz halda chégradin qoghlap chiqirilghan balilarning qayturulushigha kapaletlik qilish üchün, ukraina dairilirini qollidi.
