amérika iranning rusiyeni herbiy jehettin qollashni dawamlashturuwatqanliqini ilgiri sürdi

türkiye awazi radiyosi xewiri: aqsaray dölet bixeterlik kéngishining istratégiyelik alaqe maslashturghuchisi jon kirbi torda ötküzgen muxbirlarni kütüwélish yighinida, «iranning yenila rusiyening eng chong herbiy qollighuchisi» ikenlikini, uning rusiyeni kamikazé uchquchisiz hawa apparatliri bilen teminleshni dawamlashturuwatqanliqini ilgiri sürdi.

kirbi iranning awghust (2022) tin buyan asasliqi «guwahchi» tipliq bolup rusiyeni 400 din artuq uchquchisiz hawa apparati bilen teminligenlikini,  moskwaning bu uchquchisiz hawa apparatlirining köp qismini ukrainaning muhim ul- eslihelirige zerbe bérish üchün ishletkenlikini éytti.

jon kirbi iran «ottura sherqte amérika xadimlirigha hujum qilish üchünmu ishlitiliwatqan» bu ilghar tiptiki qoshumche uchquchisiz hawa apparatlirini moskwagha sétip bérishni dawamlashturidighan bolsa, rusiyening ularni ukrainagha hujum qilishta ishlitishni dawamlashturidighanliqini otturigha qoydi.

u rusiyening iranni bashqurulidighan bombilar, éléktiron we hawa mudapie yardimi bilen teminligenlikini tilgha élip, téhranning moskwadin milyardlarche dollarliq herbiy eslihe yardimige érishishni xalaydighanliqini bildürdi.

aqsaray dölet bixeterlik kéngishining istratégiyelik alaqe maslashturghuchisi jon kirbi rusiye bilen iranning shériklik munasiwitining ukraina bilen birlikte ottura sherqningmu muqimsizliqini keltürüp chiqiriwatqanliqini ilgiri sürdi.

washingtonning aldimizdiki künlerde rusiye bilen iranning künséri küchiyiwatqan herbiy sodisi bilen chétishliq kishi we organlargha qarshi qedem tashlaydighanliqini eskertken kirbi, hökümetler we alaqidar organlarningmu her xil tedbirlerni qollinip, iranning uchquchisiz hawa apparati pirogrammisi keltürüp chiqiridighan xeterni téximu yaxshi chüshinishke yardemchi bolidighanliqini sözlirige ilawe qildi.