makron bilen zélénskiy parizhda körüshti

türkiye awazi radiyosi xewiri: firansiye élsiy sariyi bayanat élan qilip, pirézidént makron bilen ukraina pirézidénti wolodimir zélénskiy körüshüp, ukraina-rusiye urushini muzakire qilghanliqini bildürdi.

bayanatta, ikki rehberning urushni eyiblep, rusiyening ukraina zéminliridin derhal we shertsiz chékinishi kéreklikini tekitligenliki qeyt qilindi.

bayanatta, firansiye bilen ukrainaning rusiyeni zaporizhya yadro éléktr istansisidin chékinishke chaqirghanliqi eskertildi.

bayanatta yene, firansiyening ukrainaning musteqilliqige, igilik hoquqigha we zémin pütünlükige hörmet qilidighanliqi yene bir qétim tekitlendi.

parizh hökümitining zörür tépilghanda ukrainagha qaratqan siyasiy, iqtisadiy, insanperwerlik we herbiy jehettiki qollishini dawamlashturidighanliqi körsitilgen bayanatta mundaq déyildi:

«firansiye kelgüsi bir nechche hepte ichide nurghun bataliyonlarni meshiq qildurup, ularni onlighan broniwik we yénik tipliq tankilar bilen teminleydu. bularning ichide <AMX 10-RC> tipidiki yénik tankiliri bar.»

bayanatta, parizh hökümitining tirishchanliqlirini «ukrainaning hawa mudapie iqtidarini qollash» qa merkezleshtürgenliki körsitildi.

igilinishche, firansiye ilgiri ukrainagha «2DNA» tejribixanisi ewetken we ukrainaning tinchliq pilanini qollighan.

bayanatta, ukraina we firansiyening rusiyege yéngi jazalarni yürgüzüsh chaqiriqi tilgha élinghan bolup, firansiyening ukrainaning qara déngiz ashliq kélishimini dawamlashturush tirishchanliqining muhimliqini tekitligenliki qeyt qilindi.

bayanatta, ukraina we xelqining kelgüsining yawropa ailisige tewe ikenliki, fransiyening nato-ukraina komitétini qollaydighanliqi eskertildi.