amérika - xitay otturisida yuqiri derijilik rehberler söhbiti ötküzüldi

türkiye awazi radiyosi xewiri: amérika dölet xewpsizlik kéngishi meslihetchisi jéyk sulliwan awstiriye paytexti wiyénnada xitayning yuqiri derijilik diplomati, xitay kommunistik partiyesi merkiziy tashqi munasiwetler komitéti ishxanisining mudiri wang yi bilen körüshti.

aqsaray we xitay teripidin bu heqte élan qilinghan yazma bayanatlarda, uchrishishning 10-maydin 11-mayghiche awstiriye paytexti wiyénnada emelge ashurulghanliqi bildürüldi.

amérika dölet xewpsizlik kéngishi meslihetchisi jéyk sulliwan bilen xitay kommunistik partiyesi merkiziy tashqi munasiwetler komitéti ishxanisining mudiri wang yining uchrishishi, washington bilen béyjing otturisida féwral éyida xitaygha tewe «jasusluq shari» ning amérika hawa tewelikige kirishi sewebidin kélip chiqqan kirizis, hemde amérika qoshma ishtatliri diplomatiye ministiri antoni blinkénning aldin pilanlanghan xitay ziyaritini bikar qilishidin buyanqi eng yuqiri derijilik rehberler uchrishishi boldi.

aqsaray teripidin élan qilinghan bayanatta, tereplerning amérika-xitay munasiwetliride muhim orun tutidighan mesililer, yershariwi we rayonluq bixeterlik munasiwetliri, rusiye-ukraina urushi, hemde teywen boghuzining ikki qirghiqi otturisidiki munasiwetler heqqide «semimiy, konkrét we ijabiy» söhbetlerni élip barghanliqi qeyt qilindi.

bayanatta yene, tereplerning 2022-yili 11-ayda hindonéziyede ötküzülgen 20 dölet guruhi bashliqlar yighinida amérika prézidénti jo baydin bilen xitay dölet reisi shi jinpingning uchrishishida hasil qilinghan chüshenchige asasen istratégiyelik alaqe yollirini saqlap qélish toghriliq birdeklik hasil qilghanliqi tekitlendi.

xitay teripidin élan qilinghan bayanatta, tereplerning xitay-amérika munasiwetliridiki tosalghularni tügitish we muqimliqni saqlash arqiliq munasiwetlerning nacharliship kétishining aldini élish heqqide özara pikir almashturghanliqi bayan qilindi.

bayanatta, ikki rehberning asiya-tinch okyan rayonining weziyiti, ukraina kirizisi, xelqaraliq we rayonluq mesililer heqqide muzakire élip barghanliqi, wang yining xitayning teywenge qarita meydanini qayta tekitligenliki otturigha qoyuldi.

bayanatta yene, tereplerning ikki döletning yuqiri derijilik diplomatliri we bixeterlik ishliri emeldarlirining bu istratégiyelik alaqe yolidin dawamliq paydilinish toghriliq ortaq tonush hasil qilghanliqi tekitlendi.