pakistanning sabiq bash ministiri imranxan qolgha élindi

türkiye awazi radiyosi xewiri: pakistan dölet taratqulirining xewirige qarighanda, pakistan edliye herikiti partiyesining rehbiri imranxan lahordin üstide échilghan sotqa qatnishish üchün islamabadqa barghan bolup, aliy sot mehkimisining sirtida herbiy qisimlar teripidin qolgha élinghan.

pakistan edliye herikiti partiyesining adwokatlirining biri faysal chawdri bu xewerni toghrilidi.

imranxan üstidin 90 din artuq erz sunulghan bolup, uning qaysi seweb bilen qolgha élinghanliqi éniq emes.

pakistan edliye herikiti partiyesining ezasi musarrat chima twittérda bayanat élan qilip, imranxangha qiyin-qistaq qilinghanliqini, eskerlerning imranxanni urghanliqini ilgiri sürdi.

qolgha élish herikiti,  imranxan yuqiri derijilik axbarat emeldarini özige qaritilghan qestlep öltürüsh herikitining arqisida dep eyibligendin kéyin, yüz berdi.

pakistan armiyesi tünügün (8-may) imranxanning qestlep öltürüsh herikitining arqisida yuqiri derijilik axbarat emeldari bar dep eyiblishining, «mesuliyetsizlik we asassiz» ikenlikini bildürgen idi.

imranxan 7-may élan qilghan bayanatida, bash ministir shahbaz sherif, ichki ishlar ministiri rana sanaullah we istixbarat idarisining muawin bashliqi mayor général faysal nasirning özige qaritilghan qestlep öltürüsh suyiqestining arqisida ikenlikini ilgiri sürgen idi.

imranxan 28-öktebir birleshme hökümet muddettin ilgiri saylam ötküzüshni élan qilmighanliqini seweb qilip, lahordin islamabadqa piyade yürüshni bashlighan idi.

11-ayning 3-küni wezirabadta yüz bergen oq chiqirish weqeside imranxanning ikki puti yarilanghan, bir kishi jénidin ayrilip, 13 kishi yarilanghan idi.

imranxan 10-aprél parlaméntta ötküzülgen ishench awazi bérishte, 174 awazning ret qilishi netijiside, hoquqidin ayrilghan idi.

pakistanda üch nöwet bash ministirliq wezipisi ötigen nawaz sherifning inisi shahbaz sherif 11-aprél (2023) parlaménttiki bélet tashlashta, 174 awazgha ériship, bash ministir bolghan idi.