b d t: sudandiki toqunushlar sewebidin kishilik hoquq ehwali intayin éghir
birleshken döletler teshkilati kishilik hoquq aliy komissari wolkér türk toqunushlar sewebidin sudandiki kishilik hoquq ehwalining intayin éghir ikenlikini éytti.
türkiye awazi radiyosi xewiri: wolkér türk birleshken döletler teshkilati xewpsizlik kéngishida chaqirilghan «tinchliqni qoghdash» témiliq yighinda qilghan sözide, sudan armiyesining doxturxana etrapini hujum nishani qiliwatqanliqini, téz yardem bérish küchlirining bolsa olturaq rayonlarni igiliwalghanliqini, ahalilar zich olturaqlashqan rayonlarning hujumgha uchrawatqanliqini eskertti.
u puqralarning éghir xeterge duch kéliwatqanliqini, ularning muhim yardem we ashliqqa érishishning tosqunluqqa uchrawatqanliqini eskertip mundaq dédi: «qisqisi, puqralarni ayrish, küch tengpungluqi nisbiti we xewpning aldini élish belgilimiliri her ikki terep teripidin depsende qilinmaqta, men buni qattiq eyibleymen.»
wolkér türk sudanda ishenchning yoq qilinghanliqini, shunga sudanning kelgüsi üchün organlar bilen amma otturisidiki ishenchni eslige keltürüshning intayin muhimliqini tekitlep mundaq dédi: «toqunushlar sewebidin sudandiki kishilik hoquq ehwali intayin éghir, bu tolimu échinishliq ehwaldur.»
u sudanda kishilik hoquqqa hörmet qilishni kapalet astigha alghan, natoghra qilmishlargha xatime bergen, ammining jemiyet ishlirigha ishtirak qilishigha kapaletlik qilghandila andin nöwettiki krizisini hel qilghili bolidighanliqini éytti.
sudanda 2013 – yili darfur rayonidiki qoralliq isyanchilargha qarshi hökümet armiyesini qollash meqsitide qurulghan téz yardem bérish küchlirining armiyege toluq daxil bolushi mezmun qilinghan «herbiy bixeterlik islahati» pilani mesiliside, yéqinqi birqanche aydin buyan dawamlishiwatqan ixtilap, 15 – aprél etigendin bashlap qattiq toqunushqa aylinip ketkenidi.
toqunushlarda hayatidin ayrilghanlar sanining 550 ke, yarilanghanlar sanining bolsa 4926 ge yetkenliki bildürülgenidi.
