gérmaniye engliyening sudandiki puqralirini tarqaqlashturush uslubini eyiblidi
engliyening hepte axirida élip barghan xartum elchixanisidiki xizmetchilirini tarqaqlashturush tirishchanliqining bashqa döletlerning puqralirini qutquzushini kéchiktürüwetkenliki ilgiri sürüldi.
türkiye awazi radiyosi xewiri: gérmaniyediki yuqiri derijilik menbeler engliye radiyo shirkiti — BBC ge bayanat bérip, engliye armiyesining sudan armiyesining ruxsitisizla sudangha qonghanliqini bildürdi.
bu jeryanda, yawropadiki bashqa döletler puqralirini sudandin bixeter tarqaqlashturushqa tirishiwatatti. gérmaniyemu bashqa yawropa döletlirige oxshashla xartumning shimalidiki bir ayrodurumni ishlitishni pilanlawatatti.
emma gérmaniyediki yuqiri derijilik siyasiy menbeler, «engliyening ilgiri élan qilinmighan herbiy mewjutluqi»din ghezeplengen sudan armiyesining ayrodurumgha kirishke ruxset qilmighanliqini bildürdi.
bu menbelerdin birining bildürüshiche, eskerliri sudangha ruxsetsizla kirgen engliye, eskerler dölettin ayrilishtin burun sudan armiyesige pul töleshke mejbur bolghan. ayrodurumni ishlitish söhbetliri sewebidin, gérmaniye intayin halqiliq bir peytte «kem dégende yérim kün» waqtini qoldin bérip qoyghan.
engliye dölet mudapie wazariti tarqaqlashturushning kéchikip kétishining jawabkari ikenliki toghrisidiki eyibleshlerni ret qildi.
gérmaniye sudandiki tarqaqlashturush herikitini tamamlidi. 700 din artuq adem alte ayropilan bilen tarqaqlashturuldi. igilinishiche, bu kishilerning texminen 200 i gérmaniye puqrasi, qalghanliri engliyeni öz ichige alghan bashqa 30 döletning puqrasi iken.
engliye xartumning shimalidiki ayrodurumdin paydilinip, tarqaqlashturush meshghulatlirini dawamlashturmaqta.
