kanada miqyasida dölet xadimliri ish tashlash namayishi ötküzdi
kanada miqyasidiki fédératsiye hökümet ishxanilirida ishleydighan 155 ming dölet xadimi hökümet bilen ishchilar uyushmiliri otturisidiki muzakiride kélishim hasil qilalmighandin kéyin, ish tashlash namayishi ötküzdi.
türkiye awazi radiyosi xewiri: dölette nupuzluq ishchilar uyushmilirining asasliq gewdisi bolghan kanada ammiwi mulazimet jemiyiti (PSAC) ning reisi kiris eylward ottawada ötküzgen muxbirlarni kütüwélish yighinida, ezasi bolghan 155 ming fédératsiye dölet xadimliri namidin fédératsiye hökümet bilen élip barghan muzakiride kélishim hasil qilalmaydighanliqlirini élan qildi.
kiris eylward ezalirining ish tashlashni bügün shu yerning waqti 12:01 de bashlighanliqini tilgha élip: «hazirmu arimizda musapiler bar, emma biz shundaqtimu muzakire üstilide we ümidwarmiz. meqsitimiz kélishim hasil qilish. ezalirimiz yaxshi, ochuq we adil kolléktip kélishim üchün küresh qilishqa teyyar» dédi.
eylward kanada miqyasida 250 din artuq ish tashlash liniyesi quridighanliqlirini bildürüp, muzakire üstilide söhbet qilinghan mesililerning tepsilatini ashkarilimaydighanliqlirini, emma muhim mesililer hel qilinmighiche uyushmining ish tashlashni dawamlashturidighanliqini éytti.
kanada maliye ministirliqi hökümetke wakaliten élan qilghan bayanatida, hökümetning kélishim hasil qilish üchün qolidin kélishiche tirishqanliqini, lékin uyushmining hökümetning kanada xelqige xizmet qilish iqtidarigha éghir tesir yetküzidighan teleplerde ching turuwalghanliqini bildürdi.
kanadada dölet xadimlirining ish tashlishi, bolupmu baj ishliri we pasport béjirish qatarliq 23 oxshimighan fédératsiye ammiwi xizmitining aqsap qélishigha seweb bolmaqta.
