makron: teywenning hazirqi halitining saqlinip qélishini we béyjingning «bir xitay» siyasitini qollaymiz
firansiye pirézidénti émmanuél makron teywenning hazirqi haltining saqlinip qélishi we béyjingning «bir xitay» siyasitini qollaydighanliqini bildürdi.
türkiye awazi radiyosi xewiri: firansiye pirézidénti émanuél makron gollandiyediki dölet ishliri ziyariti jeryanida bash ministir mark rutté bilen qoshma muxbirlarni kütüwélish yighini ötküzdi.
makron firansiye bilen yawropaning teywenning hazirqi halitining dawamlishishini we béyjingning «bir xitay» siyasitini qollaydighanliqini tekitlidi.
u bir muxbirning amérikaning sabiq pirézidénti donald trampning uni (makronni) «xitaygha yalaqchiliq qilish» bilen eyibligenlikini eslitip ötüshidin kéyin söz qilip: «méning trampning sözige qarita deydighan gépim yoq» dédi.
makron yene bir muxbirning: «firansiye hélihem amérikaning ittipaqdishimu?» dégen soaligha: «ittipaqdash bolush, béqinip qélish dégenlik emes» dep jawab berdi.
u firansiyening ukraina, sehrayi kebirning jenubi we teywen mesililiride héchkimdin sawaq almaydighanliqini eskertti.
émmanuél makron 5 – aprél (2023) xitaydiki üch künlük dölet ishliri ziyaritidin qaytiwétip, ayropilanda firansiye - amérika munasiwetliri we teywenge munasiwetlik mesililer toghrisida metbuatlargha bayanat bergenidi.
makronning yawropaning amérikadin musteqil bolushi toghrisidiki qarishi we dölitining xitay bilen teywen otturisida yüz bérish éhtimali bolghan toqunushqa arilishishtin saqlinishi kérekliki toghrisidiki sözliri amérika bilen polshaning naraziliqini qozghighanidi.
