sunak we baydinning ziyaritidin ilgiri shimaliy irélandiyening weziyiti jiddiyleshti

türkiye awazi radiyosi xewiri: engliye taratquliridiki xewerlerde bildürülishiche, düshenbe küni (10-aprél) zorawanliq weqeliri yüz bergen londondérri shehiridiki krégén (Creggan) qebristanliqida bir turuba ichige orunlashturulghan süniy usulda yasalghan qol bombisi bayqalghan.

shimaliy irélandiye saqchi idarisining bayanatida, bombilarning bixeter halda bir terep qilinghanliqi bildürüldi.

töt dane qol bombisi amérika pirézidénti jo baydin bilen engliye bash weziri rishi sunakning shimaliy irélandiye ziyaritidin bir qanche saet ilgiri bayqaldi.

shimaliy irélandiyede 1960-yillardin bashlap dawamlishiwatqan bölgünchi térrorluq weqeliri we mezhepler ara urushni axirlashturghan «xeyrilik jüme kélishimi» ning 25-yilliqi munasiwiti bilen ziyarette bolghan bash wezir rishi sunak we pirézidént jo baydin, shimaliy irélandiyening paytexti bélfast (Belfast) ta körüshüp, her xil xatirilesh paaliyetlirige ishtirak qilidu.

pirézidént jo baydinning ziyaritidin ikki hepte ilgiri engliyening ichki bixeterlikige mesul 5-bashqarma (MI5), shimaliy irélandyediki térrorluq tehdit sewiyesini yuqiri kötürgen idi.

londondérri shehiride düshenbe küni ötküzülgen xatirilesh murasimida, zorawanliq weqeliri yüz bergen idi. saqchi terep ruxsetsiz ötküzülgenlikini uqturghan murasimda, jumhuriyet terepdarliri 1916-yildiki «paskal isyani» ni xatiriligen idi. saqchilar bilen chiqqan sürkilishte bir saqchi aptomobiligha molotof we bashqa maddilar étilghan idi.