xelqara jemiyet israiliye eskerlirining mesjidi eqsadiki zorawanliq qilmishini eyiblidi

türkiye awazi radiyosi xewiri: birleshken döletler teshkilati (b d t) bash katipi antoniyo gutérrés israiliye bixeterlik qisimlirining mesjidi eqsadiki zorawanliq qilmishlirining körünüshlirige «kishini endiktürgüchi» dep baha berdi.

b d t bash katipi bayanatchisi istéfan dujarrik kündilik muxbirlarni kütüwélish yighinida mesjidi eqsagha qilinghan hujum heqqide toxtilip: «bash katip, israiliye bixeterlik qisimlirining qible meschitidiki zorawanliq körünüshlirige <kishini chöchütküchi, endiktürgüchi> dep baha berdi» dédi.

yehudiylar, xiristiyanlar we musulmanlar üchün muqeddes hésablinidighan hazirqidek bir peytning zorawanliq emes, tinchliq waqti bolushi kéreklikini otturigha qoyghan dujarrik, ibadet qilinidighan jaylarnimu peqet tinch shekilde ibadet qilish üchün ishlitish kéreklikini otturigha qoydi.

b d t gha eza ereb döletliri qurghan ereb guruppisimu israiliye armiyesining mesjidi eqsadiki jamaetke qaratqan hujumini qattiq eyiblidi.

mesjidi eqsada yüz bergen weqelerdin kéyin, ereb elliri ittipaqimu iyordaniye, pelestin we misir bilen masliship, «daimiy wekiller (21 dölet)» derijilik jiddiy yighin chaqirdi. ereb elliri ittipaqi birleshken döletler teshkilati xewpsizlik kéngishini israiliyening mesjidi eqsagha qaratqan jinayi qilmshilirini toxtitishqa chaqirdi.

kuweyt, liwan, marakesh, tunis, ereb birleshme xelipiliki, liwiye, aljiriye we sudan qatarliq döletlermu israiliye armiyesining mesjidi eqsagha qilghan hujumini eyiblidi.

firansiyening quddusta turushluq konsulxanisimu mesjidi eqsadiki jamaetke qilinghan hujumgha «endiktürgüchi» dep baha berdi.

muhasire astidiki ghezzede minglarche kishi mesjidi eqsagha qilinghan hujumgha naraziliq bildürdi. mesjidi eqsagha basturup kirip zorawanliq qilish qilmishi israiliyediki ereb sheherliridimu qattiq naraziliqqa uchridi.

pakistan bash ministiri shahbaz sherifmu tiwittérdiki adrésida bayanat bérip, mesjidi eqsadiki jamaetke qilinghan hujumni qattiq eyiblidi.

yüzlerche iyordaniyelik iyordaniyening paytexti ammandiki israiliye elchixanisining yénigha yighilip, israiliyege qarshi namayish ötküzdi. iyordaniye parlaméntidiki pelestin komissiyonining reisi fayiz basbusmu islam we ereb dunyasining mesjidi eqsada yüz bergen weqege bildürgen inkasini «mejburlash sewiyeside emes» dep tenqid qildi.

gérmaniyening paytexti bérlinda mesjidi eqsa hujumigha qarshiliq bildürüldi؛ pelestinliklerning tarixiy brandénburg derwazisi aldidiki parisér meydanida ötküzgen namayishigha nurghun kishi qatnashti.

gérmaniye tashqi ishlar ministirliqi bayanatchisi kristofir burgér, mesjidi eqsagha qilinghan hujumni eyibleshtin özini qachurüp, ghezzedin israiliyege qilinghan bashqurulidighan bomba hujumini ochuq- ashkara eyibleydighanliqini bildrdi.

amérika (aqsaray) dölet bixeterlik kéngishining istratégiyelik alaqe maslashturghuchisi jon kirbi israiliye armiyesining mesjidi eqsagha qilghan hujumidin küchlük ensirewatqanliqini ipadilep, zorawanliqni eyiblimestinla tereplerni jiddiychilikni ulghaytiwetmeslikke chaqirdi.

bir top yehudiy köchmenlerning «pasxa bayrimi» munasiwiti bilen mesjidi eqsagha basturup kirip, qurbanliq qilish chaqiriqidin kéyin, bir guruppa pelestinlik terawih namizidin kéyin mesjidi eqsa ichidiki qible mesjidige kiriwalghanidi.

israiliye qisimliri sohur waqtida mesjidi eqsagha basturup kirip, qible mesjige kiriwalghanlargha zorawanliq qilip, muqeddes ibadetxanini «jeng meydani»gha aylanduruwetkenidi. israiliye qisimlirining hujumi bamdat namizdin kéyinmu dawamlashqanidi.