hindistan xitayning talash- tartishliq jaylarning namlirini özgertishige qattiq naraziliq bildürdi

türkiye awazi radiyosi xewiri: xitay arunachal pradésh ölkisige qarashliq talash-tartishliq chégra rayonidiki 11 jayning namini xitaychigha özgertkendin kéyin, hindistan tashqi ishlar ministirliqi bayanatchisi arindam baghchi bayanat élan qilip: «bu özgertish xitayning tunji urunushi emes, biz buni pütünley ret qilimiz» dédi.

arindam baghchi arunachal pradéshning hindistanning ayrilmas we ötünüp bérilmes bir parchisi ikenlikini tekitlep: «oydurma isimlarni qoyushqa urunush, bu heqiqetni özgertelmeydu» dédi.

bu qétimqi yéngi jiddiylik xitay xelq ishliri ministirliqining 1- aprélda «jenubiy tibettiki bezi jughrapiyelik isimlarni qéliplashturidighanliqini» jakarliishi sewebidin bashlandi.

bu isim özgertish urunushi tagh choqqiliri, olturaq rayonlar, deryalar we ölke paytexti itanagargha yéqin yézinimu öz ichige alidu.

xitay 2017-yilimu tibetning meniwi dahiysi dalay lamaning rayonni ziyaret qilishidin kéyin, arunachal pradéshtiki alte rayonning namini özgertishke orunghan idi.

2022-yili 12-ayda ikkinchi tizimlikni ​​élan qilghan xitay dairiliri, rayondiki 15 jayning namini özgertken bolup, hindistan buninggha qattiq naraziliq bildürgen we özgertishlerni qetiy ret qilghan idi.

xitay bilen hindistan otturisidiki himalaya téghini orap turidighan chégra liniyesi her ikki dölet otturisidiki igilik hoquq talash- tartishlirigha seweb bolup kelmekte.  derya, köl, muzluqlar we qarliq choqqilarni öz ichige alghan 3500 kilométirliq chégra rayonida ikki terep otturisida pat- pat keskin toqunushlar yüz bermekte.