chéxiye parlaméntining bashliqi xitayning naraziliqigha pésent qilmastin teywende ziyarette bolmaqta

türkiye awazi radiyosi xewiri: chéxiye parlaménti bashliqi markéta pékarowa adamowa tünügün (25-mart) soda-sanaetchiler, akadémiklar we hökümet emeldarlirini öz ichige alghan 150 kishilik heyet bilen teywenge yétip bardi.

adamowa chéxiye bilen teywenning ariliqi uzun bolushigha qarimay, oxshash yadroluq qimmet qarashqa ige ikenlikini, shunglashqa chéxiyening teywenni qollaydighanliqini bildürdi.

besh künlük ziyaret üchün teywenge yétip kelgen adamowa teywen rehbiri sey yingwén bilen körüshidu hemde parlaméntta notuq sözleydu.

chéxiyening yéngi pirézidénti pétér pawél saylamda ghelibe qilip arqidinla ukraina pirézidénti wolodimir zélénskiy we teywen rehbiri sey yingwén bilen téléfonda körüshken idi. xitay «bir xitay» siyasiti bahanisi bilen bu körüshüshke qarita naraziliq bildürgen idi.

xitay öz zéminining bir qismi dep dewa qiliwatqan teywen, 1949 - yildin buyan emeliy musteqilliqqa ige bir dölet süpitide mewjutluqini dawamlashturup kelmekte.

xitay chong quruqluqi bilen teywen otturisidiki ichki urushtin kéyin peyda bolghan bu ayrilish hazirghiche dawamlashmaqta.

xitay hökümiti «bir xitay» pirinsipini tekitlep, teywenning dunyadiki döletler bilen musteqil diplomatik munasiwet ornitishigha, birleshken döletler teshkilati we bashqa xelqaraliq teshkilatlarda reismiy wekil turghuzushigha qarshi chiqip kelmekte hemde özini étirap qilghan döletlerning teywen bilen diplomatik munasiwetni üzüshi kéreklikini shert qilip kelmekte.