shiwétsiye nato qanun layihesini maqullidi

türkiye awazi radiyosi xewiri: shiwétsiye parlaméntida awazgha qoyulghan shiwétsiyening shimaliy atlantik ehdi teshkilatigha eza bolush qanun layihesi 37 ge qarshi 269 awaz bilen qobul qilindi.

solchil partiye bilen yéshillar muhit partiyesi shiwétsiyening shimaliy atlantik ehdi teshkilatigha eza bolush qanun layihesini ret qilip awaz berdi.

igilinishiche, shiwétsiye shimaliy atlantik ehdi teshkilatigha eza bolush üchün türkiye bilen wéngiriyening testiqlishigha mohtaj iken. hazirghiche shimaliy atlantik ehdi teshkilatigha eza 28 dölet finlandiye bilen shiwétsiyening shimaliy atlantik ehdi teshkilatigha eza bolushini qobul qilghan.

shiwétsiye tashqi ishlar ministiri tobiyas billstrom mezkur qanun layihesining shiwétsiye parlaméntida awazgha qoyulushini «tarixiy weqe» dep atap mundaq dédi: «ikkinchi dunya urushidin kéyin shiwétsiye bixeterlik jehette eng jiddiy weziyetni bashtin kechürmekte. shimaliy atlantik ehdi teshkilatigha eza bolush shiwétsiyening bixeterlikige kapaletlik qilish, pütkül yawropa we atlantik okyan rayonining bixeterlikini kücheytish, ittipaqliq üchün töhpe qoshushning eng yaxshi yoli.»

u sözini mundaq dawamlashturdi: «buningdin bashqa yene, shiwétsiye tor hujumliri, yéngi téxnologiye we alem qatnishi tetqiqatliri qatarliq sahelerde shimaliy atlantik ehdi teshkilatigha töhpe qoshalaydighan mislisiz iqtidarlargha ige. derweqe, shiwétsiye ishenchlik ittipaqdash dölet bolidu.».

shiwétsiye dölet mudapie ministiri pal jonsonmu shiwétsiyeni herbiy jehettin shimaliy atlantik ehdi teshkilati bilen bir gewdileshtürüsh üchün nahayiti zor tirishchanliq körsitiwatqanliqlirini bildürdi.

jonson shiwétsiyening shimaliy atlantik ehdi teshkilatigha eza bolushining yawropagha nahayiti zor töhpe qoshidighanliqini tekitlep mundaq dédi: «shiwétsiyening shimaliy atlantik ehdi teshkilatigha eza bolushi dunyada bixeterlik, mudapie we siyasiy netijiliri bolidighan tarixiy bir mesilidur.»