iranda oqughuchilarning zeherlinish weqelirige chétishliq besh kishi tutuldi
iranning fars ishtatida besh kishining mekteplerge zeherlik gaz qoyup bergenliki sewebidin tutulghanliqi élan qilindi.
türkiye awazi radiyosi xewiri: iran oqughuchilar xewer agéntliqi (ISNA) ning xewirige qarighanda, iran saqchi idarisining bayanatchisi seid muntazarulmehdi pütkül memlikette endishe qozghighan qiz oqughuchilarning zeherlinish délosigha munasiwetlik gumandarlarni tutushning tunji tepsilatliri toghrisida melumatlarni ashkarilighan.
u: «üch ayalni öz ichige alghan besh kishi, fars ölkisining laristan rayonida qizlar mektipining béghigha zeherlik maddilarni tashlighanliqi üchün tutuldi» dédi.
u gumandarlarning rayondiki yette mektepning béghigha azot gazi qachilanghan maddini atqanliqining éniqlanghanliqini bildürüp, tutulghan üch ayalning 53 qiz oqughuchining zeherlinishini keltürüp chiqarghan heriketlirini xatirilep, iran hakimiyitige qarshi turush bilen közge körüngen «iran intérnatsiyonal» téléwiziyesige ewetip bergenliklirini eskertti.
u gumandarlarning soraq jeryanida ularning meqsitining «iran hökümitige bir tereplime qarash we mekteplerde ishenchsizlik peyda qilish» ikenlikini éytqanliqini qeyt qildi.
muawin ichki ishlar ministiri mijit mirahmedi tünügünki (7-mart) bayanatida, oqughuchilarning keng kölemde zeherlinishige chétishliq ikenliki bayqalghan bir qisim kishilerning besh shtattiki istixbarat organliri teripidin tutulghanliqini bildürgen idi.
iran parlaméntida zeherlinish weqelirini tekshürüsh komitétining ezasi muhemmed hesen asferimu tünügünki bayanatida, 2022-yili 30-noyabirdin bashlap 25 ishtattiki 230 mektepte 5 mingdin artuq oqughuchining zeherlengenlikini, bularning köpinchisining qizlar ikenlikini bildürgen idi.
