iranda 5 mingdin artuq oqughuchi zeherlendi
iranda 30-noyabir (2022) din bashlap 230 mektepte 5 mingdin artuq oqughuchining zeherlengenliki bildürüldi.
türkiye awazi radiyosi xewiri: iran oqughuchilar xewer agéntliqining bildürüshiche, iran parlaménti zeherlinish weqelirini tekshürüsh komitétining ezasi muhemmed hesen asferi tünügün (6-féwral) zeherlinish weqelirige munasiwetlik istixbarat, ichki ishlar, maarip, sehiye ministirliqliri bilen inqilabiy muhapizetchiler armiyesi we saqchi idarilirining wekillirining qatnishishi astida yighin chaqirilghanliqini éytqan.
u yighinda otturigha qoyulghan doklatlar üstide toxtilip, 2022-yili 30-noyabirdin tartip 25 ishtattiki 230 mektepte 5 mingdin artuq qiz we oghul oqughuchilarning zeherlengenlikini bildürdi.
u zeherlinishning sewebini tépish üchün oxshimighan sinaqlarning qilinghanliqini eskertip, zeherning türi yaki menbesining éniqlanmighanliqini, tekshürüshlerning dawamlishiwatqanliqini qeyt qildi.
u toghrilanmighan melumatlarda asaslanghanda bezi jaylarda buzulghan méwe puriqigha oxshaydighan gaz tarqilishining barliqini eskertti.
u sehiye ministirliqining weqe üstide jiddiy tekshürüshlerni qiliwatqanliqini we ministirliqning buninggha munasiwetlik tekshürüsh doklatini kütüwatqanliqlirini sözlirige ilawe qildi.
iranda 2022-yili 30-noyabirdin tartip qiz oqughuchilar mektepliride zeherlinish weqeliri yüz bermekte. zeherlengen oqughuchilarda nepes siqilish, köngli élishish, bash aghrish we pey tartishishqa oxshash alametler körülgen.
öktichi partiyelerning ilgiri sürüshiche, weqelerning keynide ayallarni asas qilghan mehsa emini namayishlirining intiqamini élishni meqset qilghan iran hakimiyiti ichidiki bezi radikal guruppilar bar iken.
téhran hökümitige yéqin menbeler bolsa, weqelerning keynide xelqni hökümetke qarshi küshkürtmekchi bolghan guruppilarning barliqini lilgiri sürmekte.
