b d t: türkiyediki yer tewreshte kélip chiqqan ziyan 100 milyard dollardin ashidu
birleshken döletler teshkilati 6 – féwral küni qahramanmarashni merkez qilghan türkiyening 11 wilayitide yüz bergen yer tewresh apitide kélip chiqqan ziyanning 100 milyard dollardin ashidighanliqini bildürdi.
türkiye awazi radiyosi xewiri: birleshken döletler teshkilati tereqqiyat pirogrammisining türkiye wekili luisa winton b d t ning jenwe ishxanisida ötküzülgen heptilik muxbirlarni kütüwélish yighinigha ghazianteptin widéo konférans wasitisi arqiliq qatnashti.
winton 6 – féwral küni yer tewresh apiti yüz berginige bir ay bolghanliqini, yer tewresh apiti sewebidin apet rayonliridiki 2 milyon 700 ming kishining öy – makanliridin ayrilip qalghanliqini, 600 minggha yéqin bina yaki ish ornining weyran bolghanliqini qeyt qildi.
u mundaq dédi: «türkiye hökümitining hazirghiche éniqlap chiqish arqiliq xelqaraliq ittipaqdashlarning yardimide sunghan doklatida, yer tewresh apitide kélip chiqqan ziyanning 100 milyard dollardin ashidighanliqi mölcherlenmekte.»
winton apetning kölimining mislisiz sewiyede ikenlikini tekitlep mundaq dégenidi: «yer tewresh apitidin kéyin, xarabiliklerning astida kishilerning öyliri, arzu - armanliri, eslimiliri, qisqisi hemme nersisi qaldi. bu shundaq bir apetturki, 100 milyon kub métirliqtin ibaret nahayiti keng dairilik xarabilikni sheekillendürdi.»
«bizning xelqara jemiyetke béridighan signalimiz, bu apetning mislisiz ikenlikini chüshendürüsh üchündur. birleshken döletler teshkilati bash katipi antonyo gutérés éytqandek, türkiyening uzun yillardin buyan süriyeliklerge körsetken mertlikni emdi türkiyege namayan qilidighan waqit yétip keldi. bu peqet apet rayonlirini qayta qurup chiqish layihesige meblegh sélish yaki qollash jehettinla emes, türkiye xelqining kündilik hayatining normal halette dawamlishishigha kapaletlik qilish jehettinmu nahayiti zor ehmiyetke ige. derweqe, rayonning qayta tereqqiy qilishini qollash üchün nurghun pul- muamile méxanizmimu bar, elwette.»
