girétsiyede üch künlük matem élan qilindi
girétsiyede charshenbe (2023-yili 1-mart) küni yüz bergen poyiz weqeside jénidin ayrilghanlarning sani 57 ge chiqti.
türkiye awazi radiyosi xewiri: girétsiye «ERT» téléwiziyesi élan qilghan xewerde bildürülishiche, larisa shehirining shimaligha jaylashqan témpi rayonida bir yoluchilar poyizi bilen bir yük poyizining soqushup kétishi netijiside, wagonlar rélishtin chiqip kétip, aldidiki wagonlargha ot ketken we 57 kishi jénidin ayrilghan. ehwali éghir bolghan alte kishini qoshqanda jemiy 48 kishi doxturxanida balnéstqa élinghan, 56 kishining dériki élinalmighan.
weqe yüz bérishi bilen chiqqan ot sewebidin izdesh-qutquzush xizmetliride we xarabiliktin chiqirilghan bezi jesetlerni tonughili bolmighanliqi, dériki bolmighan yoluchilarning aililirining DNA tekshürüshi üchün ewrishke bergenliki bildürüldi.
girétsiye pirézidénti katérina sakéllaropulu, bash ministir kiryakos michotakis, sehiye ministiri tanos pléwris, asasliq öktichi radikal sol ittipaq rehbiri aléksis chipras, muawin dölet mudapie ministiri nikos xardaliyas we girétsiye kommunistik partiyesining rehbiri dimitris kuchumbas poyiz weqesi yüz bergen rayongha bérip, melumat igellidi.
girétsiye hökümiti dölet tarixidiki eng chong poyiz weqesidin kéyin üch künlük matem élan qildi.
paytext afénada poyiz weqesi sewebidin namayish ötküzüldi. namayishchilar parlamént jaylashqan sintagma meydanigha qarap piyade yüridi. «weqe emes, jinayet» dégen shoar yézilghan lozunkilarni kötürüwalghan namayishchilar, jinayetchilerning tépilishini telep qildi.
