putin shimaliy kawkaziyediki stawropol ziyaritini emeldin qaldurdi
rusiye krémil sariyi bayanatchisi dimitriy péskow rusiye pirézidénti wladimir putinning bryansk rayonida yüz bergen qoralliq hujum sewebidin stawropol ziyaritini emeldin qaldurghanliqini bildürdi.
türkiye awazi radiyosi xewiri: rusiye krémil sariyi bayanatchisi dimitriy péskow rusiye pirézidénti wladimir putinning bryansk rayonida yüz bergen qoralliq hujumdin kéyinki weziyet sewebidin stawropol rayonidiki ziyaritini bikar qilghanliqini, hemde rusiye bixeterlik qisimliridin qerellik uchur élip turuwatqanliqini bildürdi.
krémil sariyi bayanatchisi péskow rusiyening biryansk rayonida ukrainagha tewe ikenliki bayan qilinghan buzghunchiliq guruppisi teshkilligen qoralliq hujumlar heqqide bayanat élan qildi.
u buning «térrorluq» hujumi ikenlikini eskertip: «hazir térrorchilarni bir terep qilish üchün tedbirler éliniwatidu. biz xelqara jemiyetning diqqitini ilgirikige oxshashla térrorluq hujumlirigha dawamliq jelp qilimiz» dédi.
u: «putin krémil sariyida xewpsizlik tarmaqliridin qerellik halda weqege munasiwetlik uchurlarni éliwatidu. rusiye fédératsiye bixeterlik idarisi (FSB) ning bashliqi aléksandir bortnikow, dölet mudapie ministiri sérgéy shoygu, fédératsiye dölet mudapie idarisining bashliqi wiktor zolotow putingha doklat bériwatidu. ukraina qoralliq küchlirining hujumidin kéyin, bryansk rayonining weziyiti muhim mesile » dédi.
u bryansk rayonida yüz bergen qoralliq hujum sewebidin putinning shimaliy kawkaz rayonidiki stawropol rayonida qilidighan ziyaritini bikar qilghanliqini bildürüp: «putin oqutquchilar yili murasimining échilishigha qatnishidu, terbiyelesh pirogrammisining ishtirakchiliri bilen körüshidu, emma bularni melum sewebler tüpeylidin sin sheklide emelge ashuridu» dédi.
