tédros türkiye we süriyediki izdesh-qutquzush xizmetlirining axirlishishqa yéqinlashqanliqini bildürdi

türkiye awazi radiyosi xewiri:  dunya sehiye teshkilati diréktori tédros adxanom ghébréyésus heptilik axbarat élanqilish yighinida, 20-féwral küni türkiyede ikki qétim yer tewrigenlikini bildürüp, apetlerning rayongha dert-elem élip kelgenlikini qeyt qildi.

u yéngi yüz bergen yer tewreshlerning 6-féwraldiki apetlerge qarighanda unchiwala shiddetlik bolmighanliqini eskertti we shundaq bolsimu, ölüm-yétim hadisilirining körülgenlikini bildürdi.

u: «türkiyediki yer tewreshlerde bügüngiche jénidin ayrilghanlarning sani 47 mingdin éship ketti, 125 mingdin artuq kishi yarilandi. türkiyede eng az dégende 15 doxturxana buzghunchiliqqa uchridi, nurghunlighan sehiye esliheliri buzuldi. süriyede 145 sehiye esliheliri buzghunchiliqqa uchridi. yer tewreshlerde jemiy 26 milyon kishi tesirge uchridi. dunya sehiye teshkilati her ikki dölette sehiye jehettin muhim yardemlerni qilish üchün 84.5 milyard dollarliq yardem chaqiriqini bashlidi» dédi.

u rusiyening ukrainani ishghal qilish urushini bashlighanliqigha bir yil bolghanliqini xatirilitip, ukraina-rusiye urushining sehiye nuqtisidin éghir aqiwetlerni keltürüp chiqarghanliqini qeyt qildi.

u: «dunya sehiye teshkilati urush bashlanghandin buyan sehiye orunlirigha 802 qétim hujum qilinghanliqini toghrilidi. bu hujumlar 101 sehiye xadimi we bémarning ölümi bilen netijilendi» dédi.

u yene mundaq dédi:

«dunya sehiye teshkilati ukrainadiki shérikliri bilen yéqindin hemkarlishiwatidu, ukrainadiki sehiye xizmetlirige qatnashqan adem sani 8 milyon 400 minggha yetti. dunya sehiye teshkilati bashtin-axir ukrainagha jiddiy qutquzush mashinisi, générator, dora, zeximlinish we jiddiy opératsiye buyumlirini öz ichige alghan 3 ming tonna tébbiy malzimilerni yetküzüp berdi. dunya sehiye teshkilati yene, ukraina we musapirlarni qobul qilghan döletlerdiki 11.4 milyon kishige yardem qilish üchün 240 milyon dollar yardem telep qildi» dédi.

u wuxen wirusi üstide toxtilip: «dunya omumiy jehettin éytqanda, üch yil ilgirikige qarighanda yaxshiraq halette tursimu, emma bu wirusqa sel qarashqa bolmaydu. wirusning tarqilishini azaytalaydighan we wirustin qoghdiyalaydighan waksina tetqiq qilishqa meblegh sélish inyatin muhim» dédi.