dunya elliri türkiyege yar - yölek bolushni dawamlashturmaqta
yawropa döletlirining«100 yildin buyanqi eng chong balayiapet»dep atalghan qahramanmarashni merkez qilip yüz bergen yer tewresh apitidin kéyin, türkiye we süriyediki talapetke uchrighanlargha insanperwerlik yardem buyumlirini ewetish xizmetliri dawamlashmaqta.
türkiye awazi radiyosi xewiri: 6 – féwral küni yüz bergen 7.7 we 7.6 balliq yer tewresh apitidin kéyin, gollandiye hökümiti, süriye we türkiyediki talapetke uchrighanlar üchün yémek – ichmek, dora hemde panahlinish éhtiyajliri üchün 10 milyon yawro qoshumche yardem bérilidighanliqini jakarlidi.
türkiyening laheyde turushluq bash elchisi selchuq ünal ammiwi ortaqlishish tor béti Twitter sehipiside élan qilghan bayanatida, «hazirgha qeder gollandiyedin 19 ming issitquch, 2 ming 200 générator, 816 chédir, 32 ming ediyal, 620 tonna kiyim-kéchek, 231 tonna dawalash buyumliri, qahramanmarash, adana, hatay we ghaziantepke biwasite ewetildi» dédi.
ispaniyede toplanghan we türkiyege ewetilgen insanperwerlik yardem buyumlirining 71 tonnidin ashidighanliqi bildürüldi.
watikanning resmiy axbarat orgini «Vatican News» ning xewirige qarighanda, katoliklarning ruhaniy dahiysi we watikan pirézidénti papa firanchésko, yer tewresh apitide talapetke uchrighanlargha 10 ming térmal ich kiyimni, klistiki «musapirlar lagéri» gha ewetken.
papa firanchisko 12 – féwral (2023) eneniwi yekshenbe dua qilish paaliyitide, yer tewresh apitide talapetke uchrighanlarning derd – elemlirini yenggillitish üchün yardem telep qilghanidi.
girétsiye xelqi teripidin sheherlik hökümetler, rayonluq waliy mehkimiliri we oxshimighan organlarning wasitisi arqiliq türkiyediki yer tewresh apitide talapetke uchrighanlar üchün toplanghan ediyal, issitquch, shexsiy taziliq mehsulatliri we dora qatarliq insanperwerlik yardem buyumlirining deslepki qismi bésilghan paraxot, piré portidin yolgha chiqti.
xelqara énérgiye orgini (IEA) ning ministirlar kéngishi yighinida, texminen 40 döletning énérgiye ministirliri, «100 yildin buyanqi eng chong balayiapet» dep atalghan qahramanmarashni merkez qilip yüz bergen yer tewresh apitidin kéyin, rayonni qayta qurush xizmetlirini qollaydighanliqi toghrisida wede berdi.
xelqara énérgiye orginining reisi fatih birol dunya énérgiye shirketlirini, yer tewresh rayonida jiddiy éhtiyajliq boluwatqan issitquch, élip yürüshke eplik quyash énérgiyesi bataréyeliri we kontéynér öy qatarliq esliheler arqiliq yardem bérishke chaqirghanidi.
engliye, türkiye bilen süriye üchün yene 25 milyon fondstérling (texminen 566 milyon türkiye lirasi) yardem qilidighanliqini jakarlidi. bu yardemler, türkiyening dölet organliri, türkiye bilen süriyede wezipe ötewatqan birleshken döletler teshkilati organlirining doklatlirigha asasen élip bériliwatqan yardemler dairiside, chédir we ediyallarni yetküzüsh, dawalash etretlirini wezipige teyinlesh qatarliq xizmetlerni öz ichige alidu.
shimaliy makédoniyede islam birliki (diniy ishlar idarisi) gha qarashliq sikopzhé muptiliqi qarmiqidiki jamelerde, yer tewresh apitide talapetke uchrighanlar üchün 157 ming 620 yawro (texminen 3 milyon 200 ming lira) neq pul yardimi yighildi.
iraq kürt (kord) rayonluq hökümitide oqughuchilar, iane toplash paaliyiti dairiside toplighan 15 ming dollarni, türkiyening erbil bash konsulxanisida yer tewresh yardemliri üchün échilghan banka hésabatlirigha yatquzdi.
qatar muzéylar orgini, balilar we izchi etretlirining qatnishishi bilen, türkiye we süriyediki yer tewresh apitide talapetke uchrighanlar üchün insanperwerlik yardem seperwerlik paaliyetlirini qanat yaydurdi. paytext dohada qatar qizilay jemiyitining hemkarliqida «ular üchün ümid chirighi yandurghin» namliq seperwerlik paaliyiti dairiside, iane qilghuchilar, kiyim-kéchek, ediyal, süt, konsérwaliq yémeklik, dawalash buyumliri, oyunchuqlar we neq pul iane qildi.
texminen 20 milyon nopusning yüzde bir pirsentini teshkil qilidighan zambiyediki musulmanlar, yer tewresh apitide talapetke uchrighanlar üchün 100 ming dollar neq pul yardimi yighdi.
sérbiyening paytexti bélgrad we boshnaqlar köp sanliqni teshkil qilidighan sanjaq rayonida, türkiyediki yer tewresh apitide talapetke uchrighanlar üchün teyyarlanghan yémeklik mehsulatlirini élip mangghan yardem karwanliri, yer tewresh rayonigha qarap yolgha chiqti.
méksika teripidin ewetilgen 10 tonna insanperwerlik yardem buyumliri, türkiyening adana wilayitige yetküzüldi.
