putin apet rayonliridiki rusiye qutquzush etretlirige minnetdarliq bildürdi

türkiye awazi radiyosi xewiri: rusiye pirézidénti wladimir putin rusiye qutquzush etretlirining türkiye we süriyediki «esirning apiti» dep atiliwatqan  qahramanmarash merkezlik yer tewreshlerning zerbisige uchrighuchilargha eng baldur yardem bergen qutquzush etretliri qataridin orun alghanliqini eskertti we bu munasiwet bilen rusiye jiddiy ishlargha taqabil turush ministirliqining xizmetlirige rehmet éytti.

rusiye pirézidéntliq mehkimisi — krémil yene pirézidént wladimir putinning rusiye jiddiy ishlargha taqabil turush ministirliqigha xitaben qilghan sin körünüshlük nutqinimu jamaetchilik bilen ortaqlashti.

rusiyening qahramanmarash merkezlik yer tewreshlerdin kéyin, türkiye we süriyede muhim xizmetlerni qiliwatqanliqini tekitligen putin, sözini dawamlashturup: «rusiye jiddiy ishlargha taqabil turush ministirliqi xadimliri aldinqi hepte türkiye bilen süriyede yüz bergen yer tewreshte qaza qilghanlargha eng baldur yardem qilghan etretlerning biri. bizning qutquzghuchilirimiz, qutquzush itlirimizgha mesul xadimlirimiz, doxturlirimiz we pisxologlirimiz 24 saet dégüdekla xizmet qildi, dala doxturxaniliri tézlikte ishqa kirishtürüldi, izdesh - qutquzush xizmetliri retke sélinip nurghun kishining hayati qutuldurup qélindi» dégenlerni qeyt qildi..

putin rusiye jiddiy ishlargha taqabil turush ministirliqining yer tewreshtin kéyinki izdesh – qutquzush xizmetlirige qatnashqan etretlirige rehmet éytti.

6-féwral (2023) qahramanmarashta yüz bérip, türkiyening  10 wilayiti bilen süriyege tesir körsetken  7.7 we 7.6 bal chongluqidiki «esirning apiti» dep atiliwatqan yer tewreshte minglarche kishi qaza qildi.