b d t: türkiyediki yer tewresh dewrimizdiki eng chong tebiiy apetlerdin biri
birleshken döletler teshkilati bash katipi antonyo gutérés türkiyede 6 – féwral (2023) yüz bergen yer tewresh apiti üchün «dewrimizdiki eng chong tebiiy apetlerdin biri» dédi.
türkiye awazi radiyosi xewiri: birleshken döletler teshkilati bash katipi antonyo gutérés 6 – féwral merkizi qahramanmarash bolghan we türkiyening 10 wilayitide yüz bergen, hemde «100 yildin buyanqi ong chong balayiapet» dep atalghan 7.7 we 7.6 balliq yer tewresh apiti üchün «dewrimizdiki eng chong tebiiy apetlerdin biri» dédi.
u amérika qoshma ishtatlirining niyu york shehiridiki birleshken döletler teshkilati bash merkizide axbarat wasitilirigha türkiye we süriyede yüz bergen yer tewresh apiti heqqide élan qilghan bayanatida, mundaq dédi: «yer tewresh apitide nurghun kishiler jénidin ayrildi, buning üchün matem tutuwatimiz. derweqe, échinishliq ziyan dawamliq köpiyiwatidu. minglighan binalar weyran boldi. onminglighan kishiler soghuq qish sharaitigha duch keldi. mektep we doxturxanilar weyran boldi. balilar menggülük rohiy jehettin ziyan – zexmetke uchrimaqta.»
bash katip gutérés türkiyede yüz bergen yer tewresh apitining dewrimizdiki eng chong tebiiy apetlerdin biri» ikenlikini, yer tewresh keltürüp chiqarghan weyranchiliq we insaniy tiragédiyening aqiwetlirini téxi toluq körmigenliklirini bayan qildi.
u yer tewreshtin kéyin, birleshken döletler teshkilatining chégra halqip süriyege insanperwerlik yardem bérish paaliyetliri dairisidiki tunji qutquzush aptomobil etritining, tünügün etigen (9-féwral) tereplerde babul hawa chégra éghizidin ötüp süriyege yétip barghanliqini, emma bu yardemlerge téximu köp éhtiyajliq ikenliklirini qeyt qildi.
u hazir éytip tügetküsiz insaniy tiragédiye yüz bériwatqan süriyening gherbiy shimalida yüz bergen yer tewresh apitidin kéyin, insanlarning weyranchiliq üstige weyranchiliqni bashtin kechürüwatqanliqini eskertti.
birleshken döletler teshkilati bash katipi antonyo gutérés türkiyening on yildin köprek waqittin buyan 3 milyon 600 ming süriyelik musapirni kütüwélish arqiliq «tengdashsiz pidakarliq» ni namayen qilghanliqini, «100 yildin buyanqi ong chong balayiapet» tin kéyin, birleshken döletler teshkilatining türkiye hökümitige «qolidin kélishiche yardem bérishke teyyar» ikenlikini bayan qildi.
u xelqara jemiyetni türkiye we süriye xelqigimu xuddiy öy – makanliridin ayrilip qalghan milyonlarche musapirgha oxshashla yardem bérishke we pidakarliq körsitishke chaqirip mundaq dédi: «hazir türkiye we süriye xelqlirige yardem bérishning del waqti.»
