donétskta bir binagha bashqurulidighan bomba chüshti

türkiye awazi radiyosi xewiri: ukraina döletlik jiddiy xizmetler idarisi donétsk rayonida rusiye bashqurulidighan bombisining bir turalghu binasigha chüshkenliki toghrisida bayanat élan qildi.

bayanatta, donétsk rayonining kramatorsk shehiridiki bir binagha bashqurulidighan bombining chüshüshi netijiside, töt qewetlik binaning örülüp chüshkenliki bildürüldi.

bayanatta, izdesh-qutquzush xadimlirining bina xarabiliki astidin üch kishining jesitini chiqarghanliqi, ikki kishini qutquzuwalghanliqi bildürüldi, sekkiz kishining yarilanghanliqi eskertildi.

ukraina pirézidénti wolodimir zélénskiy bashqurulidighan bomba hujumida nurghun puqralarning jénidin ayrilghanliqini we xarabilik astida qalghanliqini bildürüp: «bu xil tiragédiyelerning tekrar yüz bérish éhtimalini nölge chüshürüsh üchün, bu rezillikni yéngish kérek» dédi.

zélénskiy jénidin ayrilghanlarning aile-tawabiatliri we tughqanlirigha teziye bildürdi, jinayetchilerning choqum jazalinidighanliqini sözlirige qoshumche qildi.

ukraina qomandanliq ishtabi bayanat élan qilip, yéqinqi 24 saette rusiye armiyesining donétsk rayonidiki slawyansk, kramatorsk we drujkiwka ahaliler rayonigha alte dane bashqurulidighan bomba atqanliqini, töt qétim hawa hujumi qilghanliqini, rakéta sistémiliri bilen 73 qétim hujum qilghanliqini bildürdi.

bayanatta mundaq déyildi:

«düshmenning hujumlirida puqralar jénidin ayrildi.»

bayanatta yene, ukraina armiye qisimlirining donétsk we luxansktiki ahaliler rayonida, rusiye armiyesini chékindürgenliki qeyt qilindi.