sténstrom: shiwétsiyede teshkillik jinayet shaykiliri térrorchilarni meblegh bilen teminlimekte

türkiye awazi radiyosi xewiri: shiwétsiyening shimaliy atlantik ehdi teshkilati-natoghagha eza bolush mesilisige mesul bash muzakirichisi oskar sténstrom, bölgünchi térrorluq teshkilati p k k/y p g ning shiwétsiyediki ehwali üstide toxtilip: «shiwétsiyede teshkillik jinayet shaykiliri p k k ni meblegh bilen teminlimekte» dédi.

oskar sténstrom shiwétsiye dölet radiyosigha bergen bayanatida, kéler hepte türkiye, shiwétsiye we finlandiye otturisidiki shimaliy atlantik ehdi teshkilatigha eza bolush mesilisige alaqidar üch terep méxanizmi yighinini qaytidin bashlash üchün türkiye bilen alaqilishishni oylishiwatqanliqini éytti.

sténstrom: «hazirche paydiliq we ishenchlik bir uchrishish bolmaydighanliqi sewebidin, bir yerge jem bolup, söhbetlishishning ehmiyiti yoq. belkim bu éhtimalliq jeryanini qiyinlashturushi mumkin. lékin yüzturane muzakirilerning dawamlishishi üchün türkiye terep bilen kéler heptining béshida alaqilishishni oylishiwatimen» dédi.

sténstrom shiwétsiye we finlandiye bilen daimiy birleshme méxanizm yighinlirining kéchiktürülüshi üstidimu toxtilip: «gerche qilinghan ish qanunluq bolsimu, türkiyening stokholm elchixanisi aldida quran kerimni köydürüsh pütkül dinni renjitti. bu shimaliy atlantik ehdi teshkilati muzakirilirige nisbeten hergizmu ijabiy emes. bu bir échinishliq ehwal we biz bu heqtiki köz qarishimizni otturigha qoyduq» dédi.

bölgünchi térrorluq teshkilati p k k/y p g heqqidimu bayanat élan qilghan sténstrom: «türkiyening finlandiyege diqqet qilishining sewebi, bu teshkilatning shiwétsiyediki iqtisad menbesining téximu köp bolushigha munasiwetliktur. shiwétsiyede teshkillik jinayet shaykiliri p k k ni meblegh bilen teminlimekte. finlandiyege oxshimaydighini, shiwétsiyede p k k ning téximu köp maliye menbesi bar» dédi.