amérikadin kéyin gérmaniyemu ukrainani tanka bilen teminleshni qarar qildi

türkiye awazi radiyosi xewiri: gérmaniye bash ministiri sholz bu heqte bayanat bérip: «bu qarar bizning ukrainani pütün küchimiz bilen qollash siyasitimizning mehsuli. biz xelqara bilen mas qedemde heriket qiliwatimiz» dédi.

gérmaniye hökümet bayanatchisi stéffén xébstréyit gérmaniyening ukrainani birinchi basquchta 14 dane bolup jemiy ikki bataliyon «2-yilpiz» tankisi bilen teminleydighanliqini bildürdi.

u yene, ukraina eskerlirini gérmaniyede terbiyelesh xizmetlirining pat yéqinda bashlinidighanliqi, gérmaniyening ukrainani eshya oboroti we oq-dora bilen teminleshni dawamlashturidighanliqi toghrisidiki uchurlarni sözlirige ilawe qildi.

bayanatchi, üchinchi döletlerning igidarchiliqidiki «2-yilpiz» tankilirini ukrainagha ewetishining testiqlanghanliqinimu jamaetchilik bilen ortaqlashti.

ukrainani rusiyege qarshi éghir tipliq qorallar bilen teminlesh mesiliside, gérmaniye éghir bésimgha duch kelgenidi. gérmaniyede yasalghan «2-yilpiz» urush tankisini ukrainagha ewetish mesilisi küchlük munazire témisigha aylanghanidi.

amérika qoshma ishtatliri pirézidénti jo baydinningmu mushu hepte ichide washingtonning ukrainani«M1 abrams» namliq tankilar bilen teminleydighanliqini élan qilidighanliqi bildürülgenidi.

bir amérika emeldari bayanat bérip: «pirézidént baydin bu hepte (baldur bolghanda ete) amérikaning ukrainani «M1 abrams» tankisi bilen teminleydighanliqini élan qilidu» dégenidi.

yene bir tereptin, rusiye pirézidéntliq mehkimisi — kirémil bayanatchisi dimitriy péskow amérika ukrainagha ewetishni pilanlawatqan abrams tipliq tankilarning ünümini köptürüwetmeslik kéreklikini otturigha qoyup: «bu tankilarmu bashqilargha oxshash köyüp kétidu. emma, ular intayin qimmet bolup, chiqimi asasliqi yawropaliq baj tapshurghuchilarning yelkisige chüshidu» dédi.