erdoghanning shiwétsiyege bildürgen naraziliqi dunya metbuatida...

türkiye awazi radiyosi xewiri: jumhur reis rejep tayyip erdoghanning daniyelik ashqun ongchil «qattiq yönilish partiyesi» rehbiri rasmus paludanning quran kerimge qilghan hujumi munaswiti bilen shiwétsiye hökümitige bildürgen naraziliqi dunya metbuatlirida küchlük ghulghula qozghidi.

shiwétsiyede chiqidighan «aftonbladét» géziti erdoghanning sözlirini bash téma qildi؛  xewerde, stokholm uniwérsitéti türkiye tetqiqatliri instituti mudiri doktor paul léwinning «quran kerimge qilinghan hujum sewr qachisini tashuruwetken eng axirqi tamche boldi» dégen sözlirige orun bérildi.

shiwétsiyening «swénska dagbladét» gézitimu shiwitsiyening shimaliy atlantik ehdi teshkilati — natogha eza bolush iltimasining qollashqa érishelmeydighanliqini, finlandiyening shiwétsiyedin musteqil halda natogha eza bolushining mumkinlikini yazdi.

merkizi londongha jaylashqan roytérs xewer agéntliqimu erdoghanning bayanatini gewdilendürüp, eng yéngi özgirishlerning türkiye bilen shiwétsiye otturisidiki sürkilishni kücheytiwetkenlikini ilgiri sürdi.

engiliyening BBC, firansiyening Ouest France, qatarning eljezire qanallirimu jumhur reis erdoghanning shiwétsiyeni agahlandurghanliqini xewer qildi.

amérikada chiqidighan washingiton pochtisi géziti, jumhur reis erdoghanning naraziliqini «paludanning namayishigha yol qoyushning aqiwiti» dégen téma astida oqurmenliri bilen ortaqlashti.

paludanning quran kerimge qilghan qebih hujumidi kéyin, jumhur reis erdoghan shiwétsiye hökümitige naraziliq bildürüp: «nato mesiliside bizning héchqandaq yardimimizge érishelmeysiler. elchixanimiz aldida bundaq nomussizlarche qilmishning yüz bérishige seweb bolghanlar, natogha ezaliq iltimasi mesiliside bizdin xeyrxahliq qilishimizni kütmesliki kérek» dégenidi.