bélgiye marakeshlik imamni chégradin qoghlap chiqardi
ilgiri firansiye chégradin qoghlap chiqirish qarari alghandin kéyin, bélgiyege qéchip ketken marakeshlik imam hesen ikyussén biryussél hökümiti teripidin chégradin qoghlap chiqirildi.
türkiye awazi radiyosi xewiri: hesen ikyussén marakeshke sürgün qilinghandin kéyin bélgiyening panahlinish we köchmenler ishlirigha mesul ministiri nikol dé mor yazma bayanat élan qildi.
nikol dé mor ashqunluqni qollaydighan kshilerning bélgiye zéminida aylinip yürüshige yol qoyushi mumkin emeslikini tekitlep, «bu yerde turush hoquqi bolmighan hemmeylen chégradin qoghlap chiqirilishi kérek» dédi we bu mesilide firansiye bilen yaxshi hemkarlashqanliqini bildürdi.
marakeshlik imam hesen ikyussén bolsa, ijtimaiy taratqularda tarqitilghan körünüshlerde kasablanka ayrodoromida aile ezaliri teripidin qarshi élinghanliqini we marakesh dairiliriningmu özini yaxshi qarshi alghanliqini bildürdi.
marakesh dairiliri hesen ikyussénning chégradin qoghlap chiqirilishigha qarita we uning üstidiki eyibleshlerge qarita téxiche héchqandaq bayanat élan qilmidi.
firansiye ichki ishlar ministiri gérald darmanin 28 - iyul tiwittér hésabida hembehirligen bayanatida, «marakeshlik imam fransiyening qimmet qarashlirigha, sékularizm we er ayallarning barawerlik pirinsiplirigha zit sözlerni qildi. shunga firansiyedin qoghlap chiqirilidu» dégen idi.
parizhdiki memuriy sot mehkimisi 5 - awghustta ministir gérald darmaninning hesen ikyuussénni chégradin qoghlap chiqirish telipini waqtinche tonglitishni qarar qilghan idi.
firansiye dölet kéngishi 30 - awghustta memuriy sotning bu qararini emeldin qaldurup, marakeshlik imamning chégradin qoghlap chiqirilishigha yéshil chiragh yéqip bergen idi.
hesen ikyuussénning firansiyedin qoghlap chiqirish qararidin kéyin, bélgiyege qéchip ketkenliki we séntebirning axirida bélgiyede nazaretke élinghanliqi bildürülgen idi.
