afghanistanda xizmet qilidighan ayallargha qarita yéngi bir cheklime élan qilindi
taliban xizmet qilidighan ayallargha qarita yene bir cheklimini élan qildi.
türkiye awazi radiyosi xewiri: taliban afghanistanda paaliyet élip bériwatqan yerlik we chet ellik ammiwi teshkilatlarning ayal xadimlarni ishlitishining ikkinchi buyruq chüshkenge qeder cheklengenlikini élan qildi.
taliban waqitliq hökümitining iqtisad ministirliqi bayanatchisi abdurahman hebib ministirliqning bu qararining memliket miqyasidiki barliq ammiwi teshkilatlargha yollanghanliqini we bu qarargha qetiy emel qilish kéreklikini tekitlidi.
abdurahman hebib bu qararning chet ellik ayal xadimlarnimu öz ichige alidighan yaki almaydighanliqigha dair soalgha jawab bérishtin özini qachurdi.
ministirliqning bayanatida, bu organlarda ishleydighan ayallarning taliban hökümiti yolgha qoyghan hijab qaidisige «muwapiq emel qilmighan» liqigha dair nurghun shikayetler tapshurup élinghanliqi uqturuldi.
bayanatta, ayal xadimlarni xizmettin chiqarmighan ammiwi teshkilatlarning ijazetnamisining emeldin qaldurulidighanliqi uqturuldi.
taliban waqitliq hökümitining aliy maarip ministirliqi 20 - dékabirda afghanistandiki barliq döletlik we xususiy uniwérsitétlargha buyruq chüshürüp, qiz oqughuchilar maaripining ikkinchi uqturush chüshkenge qeder toxtitilghanliqini élan qilghan idi.
taliban ötken yili 15 - awghustta afghanistan hakimiyitini alqinigha alghandin kéyin, dölet we xususiy tarmaqlarda ishleydighan nurghun ayallar xizmitidin ayrilip qalghan idi.
